𝐌𝐚𝐠𝐚𝐚𝐥𝐚𝐚𝐧 𝐒𝐡𝐢𝐫𝐞𝐞 𝐇𝐮𝐦𝐧𝐚 𝐐𝐢𝐥𝐥𝐞𝐞𝐧𝐬𝐚𝐚 𝐄𝐫𝐭𝐞𝐫𝐚𝐚𝐧 𝐡𝐚𝐥𝐞𝐞𝐥𝐚𝐦𝐭𝐞

Maddeen Oduu Tigraayi irraa akka hubachiisanitti Humni Qilleensaa Erteraa guyyaa har’aa sa’aa booda magaalaa Shiree irratti haleellaa xayyaaraa akka raawwataniiru. Haleellaan kun manneen ummataa irratti xiyyeeffachuu kan ibsan maddeen kunniin, namaa fi qabeenya irra miidhaan dhaqqabuu addeessu. Hanga nama haleellaa kanaan du’ee hanga ammaatti waan jedhame hin jiru. Haleellaa kanas ta’e haleellawwan biroo amma dura ta’an kan Bulchiinsi Mootummaa Naannoo Tigraayi mootummaa Itophiyaa fi Erteraa himataa tureef deebisaan kennan buufata waraanaa irratti xiyyeeffanne jechuun haalaa turan. 

Waraana waggoota lamaaf Adda Bilisummaa Ummata Tigraay (TPLF) fi mootummaa Itophiyaa gidduutti deemaa jiru dhaabsisuu fi gara marii araaraatti fiduuf yaalii Gamtaan Afrikaa godhaa jiru kan Afrikaa Kibbaatti har’aa fi bor ni jalqabama jedhamee eegamaa ture sababoota hanqina dinagdee dhaabbaticha mudatee fi maanguddummaan araarsituu ta’anii Gamtaa Afrikaan filaman piresidaantiin Kenya duraanii Uhuuruu Keenyaattaa qooda irraa fudhachuu diduun walqabatee yeroo hin beekamneef hafee jira.