Yeroo adda addaatti hidhaan gidirsamaa fi sochii dargaggoota Oromoo keessatti qooda guddaa qabaachaa kan ture miseensi Gumii Sabaa ABO J/Mo’iboon Baqqalaa Onkoloolessa 12,2022 guyyaa har’aa galgala kana naannoo Saansuusii jedhamutti haala nama gaddisiisuun rasaasa lamaan mataa irra rukutamee hospitaala Abeet jedhamu naannoo Goojjam Baarrandaatti argamutti waldhaansa irra akka jiru ibsameera.

Akka odeessi arganne ibsutti Jaal Mo’iboon hanga ammaatti lubbuudhaan jira. Haleellaan irratti raawwatame ulfaataa waan ta’eef, lubbuu isaa hambisuudhaaf namnuu waan danda’uun itti dirmatuu qaba jenna.

Sirna mootummaa Bilxiginnaa jalatti miseensii fi deggeraan ABO, darbees sab-boontotnii fi qeerroon Oromoo nagaan ba’anii galuun kan yeroo kamii caalaatti ulfaataa ta’aa dhufuu tarkaanfii gaddisiisaa fi rifaasisaan dargaggoo Mo’iboon Baqqalaa irratti fudhatame ragaa guddaa dha.