𝐀𝐤𝐤𝐚 𝐒𝐚𝐛𝐚𝐚𝐭𝐭𝐢 𝐒𝐚𝐥𝐩𝐡𝐢𝐧𝐚𝐭𝐮 𝐎𝐫𝐨𝐦𝐨𝐨𝐭𝐭𝐢 𝐃𝐡𝐮𝐟𝐞

Wareegamni Qeerroo kaleessaa gabrummaatti xumura gochuuf, du’aa fi boo’icha, gadadoo fi hiraara lammiitti xumura gochuuf ture. Wareegamootni waggootaaf qabsaawotni, sabboontotnii fi Qeerroon Oromoo kafalan dhumaatii fi salphina har’a Oromoo mudataa jiru argamsiisuuf hin turre. Sirna cunqursaa fi gabroomfataa tokko kaasanii, mootummaa fi sirna irra hamaan bakka buusuufis hin turre. Erga waggoota afurii kan ta’aa fi argamaa jiru garuu faallaa wareegama qeerroo Oromoo fi waliigala ummata Oromoo ti.

Dhumaatiin dhaqqabaa jiru, salphinni akka sabaatti Oromoo qe’ee isaatti isatti dhufe, gaaga’amni isa mudatee jiru, kan isa teessisu miti. Kana caalaa maaltu Oromootti dhufuu qaba?

Jumlaan ajjeesamaa jira. Salphisameera. Qe’ee isaa keessatti alagaan weeraramee kabajaa namummaan alatti akka bineensaatti ajjeesamee ibiddaan gubataa jira. Reeffi isaa kabajaa dhabee ibiddaan gubachuu caalaa, warri isa ajjeesanii reeffa isaa guban suuraa irratti ka’anii nutu kana si godhe, maal fidda ittiin jedhaa jiru.

Biyya isaa keessatti qe’ee fi qabeenya isaa irraa humna alagaa hidhatee isatti duuleen kumoota dhibbaan buqqa’ee akka hawaasaatti diigameera. Taateen durii seenaa Oromoo keessatti baratamu har’a deebi’ee, tokko lamaan gochi fokkisaan kaleessaa sun har’a jaarraa 21^ffaa  kana keessa saba Oromoo mudataa jira. Kana caalaa waan Oromootti dhufu maaltu jira ykn kan hafe maaltu jira?

Salphina kana jalaa Oromoon of baasuu qaba. Roorroo falmatuun dirqama dhala Oromoo ti. Qeerroon Oromoo kaleessa wareega baasee, dhiigaa fi lafee isaan sirna cunqursaa calaase, har’as humni isaa bakkuma jira. Humni kun ka’uu dha qaba.

Yeroo hamtuu fi ulfaattuu kana keessa tokkummaa feesisa. Sagalee tokkoon ka’anii, wal cina dhaabbatanii roorroo fi salphina akka sabaatti dhufte kana LAKKII NU GAHE! jechuu dha qaba Oromoon. KA’I QEERRO!