𝐖𝐚𝐫𝐚𝐚𝐧𝐧𝐢 𝐌𝐨𝐨𝐭𝐮𝐦𝐦𝐚𝐚 𝐌𝐚𝐧𝐚 𝐀𝐛𝐛𝐚𝐚 𝐆𝐚𝐝𝐚𝐚 𝐆𝐨𝐨𝐛𝐚𝐧𝐚𝐚 𝐇𝐨𝐨𝐥𝐚𝐚 𝐬𝐚𝐤𝐚𝐭𝐭𝐚’𝐮𝐮𝐧 𝐐𝐚𝐛𝐞𝐞𝐧𝐲𝐚 𝐬𝐚𝐚𝐦𝐚𝐧𝐢𝐢 𝐢𝐥𝐦𝐚 𝐢𝐬𝐚𝐚𝐧𝐢𝐢 𝐚𝐦𝐦𝐨𝐨 𝐭𝐨’𝐚𝐭𝐧𝐚𝐚 𝐣𝐚𝐥𝐚 𝐨𝐨𝐥𝐜𝐡𝐮𝐮𝐧 𝐝𝐡𝐚𝐠𝐚’𝐚𝐦𝐞.

Humnoonni nageenyaa mootummaa halkan mana jireenyaa Abbaa gadaa Goobanaa Hoolaa Godina Shawaa Bahaa magaala Maqiitti argamu cabsanii seenuun erga saamanii booda, ilma isaanii tokko to’annoo jala oolchuu, Addis Standard Abbaa Gadaa Goobanaa Hoolaa waabeffachuun gabaaseera.

Miseensonni humnoota nageenyaa mootummaa halkan edaa ALItti sa’aa 5:00 hamma ganama sa’atii 12:00tti qe’ee isaanii sakatta’aa erga turanii booda, qarshii 200,000 fi meeshaalee miidhaginaa fi faayaa adda addaa akka saaman Abbaan Gadaa Goobanaa Hoolaa Addis Standarditti himaniiru.

Sababiin tarkaanfii kanaa shakkii ilmi Abbaa Gadaa kan Addunyaa Goobanaa gobla Waraana Bilisummaa Oromoo Godina Shawaa Bahaa keessa socho’u hoogganaa jira jedhuun ta’uu Abbaan Gadaa ibsaniiru.

Kana malees, humnoonni nageenyaa mootummaa kunneen ilmaan isaanii magaaluma Maqii keessa jiraatu Injinar Badhaanee Goobanaa qe’ee isaatii halkan edaa to’annoo jala kan olchan ta’uu fi waardiyaa mana isaanii ammoo uleedhaan dhaanuu isaanii Abbaa Gadaa Goobanaa Hoolaa Addis Standardiif himaniiru.