Miseensi Gumii Sabaa ABO J/Hundee Daraaraa Sirna PPn Hidhame

Mootummaan Paartii Bilxiginnaa miseensota ABO adamsee hidhuu kan itti fufe yoo ta’u, Amajjii 19,2023 kaleessa galgala sa’aa 7:00 ykn ALItti sa’aa 1:00 irratti miseensa GS-ABO J/Hundee Daraaraa mana isaatii qabuun hidhee jira.

J/Hundee Daraaraa yakka tokkoon maleetti qaamota nageenyaa sirna PPn qabamuun buufata poolisii magaalaa Zuwaayitti hidhamee akka jiru oduun SBO dhaqqabe mirkaneesseera.

Miseensi GS-ABO J/Oromsiis Elemoos Mudde 21,2022 bal’eessaa malee mana jireenya isaa magaalaa Hararii qabamee magaalichumatti hidhamuun hanga har’aatti hidhaa keessatti hiraarsamaa jira.

Kana malees Amajjii 13,2023ttis mootummaan Bilxiginnaa Shaashamanneetti kan argamu mana Obbo Dhaqqabaa Waariyoo erga weerarsiisee booda, maanguddoo Obbo Dhaqqabaa Waariyoo qabee hidhuun hidhaa keessatti rakkisaa jira.

Haaluma walfakkaatuun jalqaba ji’a kanaattis J/Mahammad Amiin Faaris Godina I/A/Booraa magaalaa Mattuutti miseensa Koree Waajjira ABO kan ta’e Haadha isaa dhukkubsattee Godina Jimmaa Ona Sigimootti argamtu dubbisuuf akkuma dhaqeen caasaa Bilxiginnaa onichaan qabamee hidhaa keessatti argama.