Miseensa gameessa ABO kan turan maanguddoon Oromoo Obbo Qannoo Shiboo du’aan addunyaa irraa boqotan.

Bara Mootummaa Ce’umsaa kaasee hanga gaafa du’aniitti miseensa ABO ta’uudhaan qabsoo saba isaanii keessatti qooda mul’ataa kennaa kan turan maanguddoo Oromoo Obbo Qannoo Shiboo, dhukkubsatanii Hospitaala Naqamteetti waldhaanamaa erga turanii booda, guyyaa kaleessaa Bitootessa 02,2023 du’aan addunyaa kana irraa darbaniiru.

Dirqama qabsoo dhaaba isaanii irraa itti kennamaa ture of qusannaa malee raawwataa kan turan oggaa ta’u, addatti Waraana Bilisummaa Oromoo (WBO) Dirree Dhihaatti gadhaabuuf hojii qabsoo ABOn hojjechaa ture keessatti Obbo Qannoo Shiboo qabeenyaa fi maallaqaan gargaarsa olaanaa godhaa akka turan seenaan qabsoo isaanii ni mul’isa.

Sab-boonummaa qabaachuu fi miseensa ABO ta’uu isaanii qofaaf bara mootummaa wayyaanee/EPRDF waggoota 10f Maa’ikalaawwiitti hidhamanii dararamaa kan turan maanguddoo Oromoo Obbo Qannoon, bara 2018 wayta Hogganni ABO gara biyyaatti deebi’u, simannaa Jila ABO magaalaa D.Doollootti godhame kanneen adda durummaan qindeessaa turan keessaa isaan tokko turan.

Kanaan alatti Obbo Qannoo Shiboo dhimma hawaasaa keessatti gorsaa, qajeelchaa fi ulfaataa jaarsa biyyaa turan kan jedhan jiraattotni magaalaa D.Doolloo, Odaa guddaa, utubaa fi dagaleetu nu irraa boqote jechuun jaalala isaan hawaasa keessatti qaban mul’isaniiru.

Sirni awwaalcha maanguddoo Oromoo Obbo Qannoo Shiboo har’a Bitootessa 03,2023 bakka miseensotni, deggertootnii fi ummatni bal’aan magaalaa D.Doolloo argamanitti raawwatameera.

Sagaleen Bilisummaa Oromoo maatii, firootaa, hiriyootaa fi hawaasa D.Doolloof jajjabina hawwa.