Mootummaan Ce’umsaa Tigraayii fi ABUT murtee boordiin filannoo ABUT haquuf dabarse morman.

Mootummaan Ce’umsaa Tigraayii fi Addi Bilisummaa Ummaata Tigraay (ABUT) murtee boordiin filannoo Itoophiyaa ABUT haquuf dabarse mormuu isaanii ibsa baasaniin ifa godhaniiru.

Murteen boordichi Adda Bilisummaa Ummata Tigraayi (ABUT) beekamtii dhoowwachuu fi paartilee siyaasaa biyyattii keessaa haquuf dabarse kun “kan fudhatama hin qabnee dha” jechuun mootummaa ce’umsaa ijaaramee fi waliigaltee waraana dhaabuu mallatteeffame irratti miidhaa geessisaa jedhamuu Addis standard gabaaseera.

Mootummaan Ce’umsaa Tigraay murteen kun “jiraachuu Mootummaa Ce’umsaa gaaffii keessa kan galchuu fi adeemsa waliigaltee nageenyaa guutummaan guutuutti kan jeequu dha” jechuun qeeqeera. Adda Bilisummaa Ummata Tigraay (ABUT) kan “abbaa waliigaltee nageenyaa” ta’e seerummaa dhowwachuun seeraanis ta’e siyaasaan fudhatama hin qabu jedheera. Murteen kun “waliigaltee priitooriyaa” kan diiguudhas jedheera addichi.

Murtee boordiin filannoo biyyaaleessa torban darbe keessa waraana Tigraay sababeeffachuun kan darbe ta’us waraanni dhaabbatee jiraachuu ifa godhe.  

Motummaan Ce’umsaa Tigraay kan humnoota Tigraay, hojjettoota mootummaa fi paartii mormitootaa of keessaa qabu kun, murteen boordichi dabarse “waliigaltee nagaa mallattaa’e hiika akka dhabsiisuu fi jiraachuu anga’oota TPLF kan marichatti hirmaataniis ni waakkata jedheera.

Akkasumas, paartiin Adda Bilisummaa Ummata Tigraayi (ABUT) murtee kana kan hin fudhanne ta’uu ibsuun dhimmicha irratti qaamota dhimmi ilaallatu wajjiin kan mari’atu ta’uu beeksiseera.

Mootummaan Ce’umsaa Tigraayii fi Addi Bilisummaa Ummata Tigraayi (ABUT) Boordiin Filannoo murtee kana akka geeddaru ibsa baasaniin gaafataniiru.

Murteen kun waliigaltee Pritooriyaa kan Gamtaan Afrikaa, Gamtaan Awurooppaa, Mootummootni Gamtoomanii fi mootummoonni biyyoota biroo beekamtii kennaniif kan cabsu ta’uus addeessaniiru.