Jaal Gadaa Gabbisaa dhibee Tiruun yeroo dheeraadhaaf dhukkubsataa jiru, ammaa ammoo rakkoo Onneef saaxilamee akka jiru ibsame.

Hogganootaa fi qondaalota ABO yakka takkaan maleetti mana hidhaa sirna biltsiginnaa keessatti waggootaaf hiraarfamaa jiranii fi wayta ammaa Qajeelcha Poolisii Magaalaa Buraayyuutti argaman keessaa tokko kan ta’e Jaal Gadaa Gabbisaa, dhibee tiruun alatti, rakkoo Onneef saaxilamee akka jiru doktoorri isa waldhaanu mirkaneessee akka jiru oduun SBO dhaqqabe ifa godha.

Jaal Gadaa Gabbisaa haala ulfaataa keessa jiraachuu kan ibsu oduun nu gahe, qoricha dhibee tiruu fudhataa jiru irraa ykn waan dhibii haa ta’uu waan adda bahe ifa ta’uudhaa baatus, rakkoo Onneef saaxilamee akka jiru garuu doktoorri isaa mirkaneessuu hubachiisa.

Jaal Gadaan gosa dhibee tiruu #Hepatitis B Viral Positive jedhamu dhukkubsataa jirutti dabalee rakkoon Onnee irratti mul’achuun fayyummaa isaaf yaaddoo biraa ta’uu irraa, hanga haalli isaa gar-tokkotti deebi’utti guyya guyyaan deddeebi’ee hordofamuu akka qabu doktoorri isaa ajajuus oduun kun ni ibsa.

Haaluma walfakkaatuun miseensi GS-ABO Jaal Kennasaa Ayyaanaas, haalli fayyaa isaa jijjiirama agarsiisaa kan hin jirree fi hir’ina gargaarsaa irraa akka silaa feesisutti waldhaansa maluuf argataa akka hin jirre hubatuun danda’ameera. Sababa kana irraa torbanitti yeroo sadii deddeebi’ee waldhaansa “physiotherapy” fudhachuun kan irra ture tokkotti deebi’ee jira.

Hogganootnii fi qondaalotni ABO namootni 7 dabaa fi cubbuudhaan sirna mootummaa PPn qabamanii manneen hidhaa sirnichaa garagaraa keessatti gidirfamaa turanii fi dhibeelee adda addaaf akka saaxilaman taasisaman, yeroo ammaa Qajeelcha Poolisii Magaalaa Buraayyuutti argaman:-

1) Jaal Abdii Raggaasaa

2) Jaal Mikaa’el Booran

3) Jaal Kennasaa Ayyaanaa

4) Jaal Dr.Gadaa Oljirraa

5) Jaal Gadaa Gabbisaa

6) Jaal Daawit Abdataa fi

7) Jaal Lammii Beenyaa yoo ta’an, marti isaanii dhibeelee adda addaaf saaxilamanii hidhaa keessatti ittiin hiraaraa jiran.

Mootummaan biltsiginnaa halaalatti ABO sodaatu, dhaabicha dadhabsisuu fi sochii isaa laamshessuu yaada jedhu irraa badii tokko malee hogganootaa fi qondaalota ABO kanneen, manneen jireenyaa isaanii irraa qabuudhaan mirga isaanii sarbee waggoota sadiif hidhaa keessatti itti roorrisaa, dhibeelaa adda addaaf akka saaxilaman gochuun yakka ulfaataa irratti raawwatee jira.

Manni murtii dhimma hoggantootaa fi qondaalota ABO kanatti xumura gochuun, badiin kan irratti hin argamne waan ta’aniif, gadhiifamuu akka qaban murteessu illee, mootummaan PP Dr.Abiy Ahmediin durfamu olaantummaa seeraaf buluu diduun poolisiin Oromiyaa qabee akka taa’u ajaje.

Addi Bilisummaa Oromoo yeroo garagaraatti, mootummaan paartii biltsiginnaa hogganootaa fi qondaalota isaa seeraan ala hidhe gadhiisuu akka qabu, hawaasni idil addunyaa mootummaa seeraaf hin bullee fi hin ajajamne kana irratti dhiibbaa akka godhan gaafataa ture; ammas gaafataa jira.

Komiishinii Mirgoota Namoomaa Itophiyaa dabalatee dhaabbattootni mirga dhala namaaf falman adda addaas mootummaan Itophiyaa hogganootaa fi qondaalota ABO manni murtii bilisa godhe qabee taa’uun seera miti; gadhiisuu qaba jechuun gaafataa turuun isaanii kan yaadatamuu dha.

Hawaasni Oromoo biyyoota garagaraatti argaman nuffii fi dadhabbii tokko malee, hogganootaa fi qondaalota ABO, akkasumas ilmaan Oromoo sirni mootummaa PP maqaa adda addaa itti maxxansuun manneen hidhaa garagaraa keessatti yakka ulfaataa irratti raawwataa jiruuf sagalee ta’uu fi gargaaruu qabuun dhaamsa keenya.

E-mail: sbo.radio88@gmail.com

Page: Sagalee Bilisummaa Oromoo

Youtube:www.youtube.com/channel/UC4FHzb0KMgQuvdnlzRldLcw

Website:www.voiceoforomoliberation.com

WhatsApp: +254736981192