Sudaan Hariiroo IGAD Waliin Qabdu Addaan Kutuu Ibsite; Itophiyaan Walgahii IGAD Irratti Argamuu Akka Hin Dandeenye Hubachiiste.

Sudaan, Mootummootni Misoomaaf Gamtoomanii (IGAD) dhimma keessoo Sudaan keessa waan galeef jecha, marii rakkoo biyyattii furuuf dhaabbaticha waliin eegalte addaan kutuu ifa gooteetti.

Sudaan ibsa Kibxata darbe baasteen, xalayaa Ministeerri Dhimma Alaa Sudaan dura ta’aa IGAD kan ta’an Ministeera Dhimma Alaa Jibuutiif barreesseen, mootummaan Sudaan marii rakkoo Sudaan furuu dhaabbaticha waliin eegale addaan kutuu ibseera.

Sudaan murtee kana kan murteessite walgahii adda ta’e IGAD osoo mootummaa Sudaan dursee hin beeksisin qopheessee fi marii kana irratti hogganaa hidhattoota Sudaan walgahii Kaampaalaatti geggeeffamu kana irratti afeeruu hordofee akka ta’e maddeen gabaasaniiru.

Oduuma walfakkaatuun Itophiyaanis walgahii IGAD Amajjii 18, 2024tti yaame kana irratti kan hin argamne ta’uu beeksisteetti.

Ministeerri Dhimma Alaa Itophiyaa xalayaa dura ta’aa IGADf barreesseen,   “Sababa sagantaa biraa kanaan dura tureen walirra bu’ee fi hubachiisa gabaabduu walgahicha irratti akka hirmaaannu gaafatamneen” Itoophiyaan walgahii Ugaandaa, Kaampaalaatti qophaa’e kana irratti hirmaachuun kan rakkisu ta’uu addeesseera.

Siyaasni Gaanfa Afrikaa kan yeroo kamii caalaatti boora’aa, walxaxaa fi daran kan duumessaa’e ta’uu haalli mul’ataa jiru kan hubachiisu yoo ta’u, kunis muddama  jiru caalaatti kan hammeessaa jiru ta’uu kan agarsiisuu dha.