Bahaa fi Lixa Shaggar Akkasumas Kibba Oromiyaa fi Baha Wallaggaa Keessatti Ummatni Meeshaalee Waraanaa Gugurdoon Haleelamuun Miidhama Ulfaataaf Saaxilamaa Jira

Mootummaan PP WBO golgaa godhatee hidhaa, ajjeechaa fi saamicha ummata Oromoo irratti deemsisu akka maleetti hammeessuu fi babal’isuudhaan  waraana dhaabbataa RIB jedhamu, humna addaa, poolisa, miliishaa fi amma ammoo gaacha sirnaa kan jedhu ijaaruudhaan guutuu godinaalee Oromiyaatti bobbaasee yakka waraanaa lammiilee nagaa irratti raawwatu itti fufeera.

Keessumaa erga guyyoota 11 as Bahaa fi Lixa Shaggar keessatti waraanni, miliishaan, poolisootnii fi gaachana sirnaa kan jedhaman ummata nagaatti bobba’uun yakka ulfaataa kan raawwataa jiran yoo ta’u, waraanni mootummichaa RIB jedhamu ammoo meeshaalee gugurdaa fi baranee qe’ee ummataa keessatti dhukaasuun lubbuu namoota hedduu dhabamsiisaa, qabeenya barbadeessaa fi lammiilee kumootaan qe’ee irraa buqqisaa jira.

Erga dhihoo kanaa as ammoo Onoota Lixa Shaggar Jibaat, Daannoo, Dirree Incinnii, Tokkee Kuttaayee fi kanneen itti dhiheenyatti argaman keessatti meeshaalee gugurdoo fi baranee ta’an fageenya irratti rukutan RIB mootummaa Biltsiginnaan maqaa WBO rukutuu jedhuun gandeenii fi qe’ee ummataa keessatti dhukaafamaa jiran namoota hedduu ajjeesuu, qaamaa hir’isuu, qabeenyaa fi manneen barbadeessuu akkasumas ummatni lakkoobsaan guddaa ta’e mana ofii gadhiisee akka baqatu taasisaa jiraachuu maddeen Lixa Shaggar gabaasaniiru. Xayyaarotni waraanaa mootummichaas godinicha keessatti ummata nagaa fixaa, qe’ee fi qabeenya barbadeessaa jiru jechuun maddeen kunniin ni hubachiisu.

Yakki waraanaa ummata Oromoo bal’aa fi hawaasa addunyaa jalaa dhokfamee Lixa Shaggar keessatti waraana mootummaa PPn ummata nagaa irratti raawwatamaa jiru lubbuu qonnaan bultoota Oromoo hedduu dhabamsiisuu fi kumootaan akka buqqa’an taasisaa jiru guyyaa 11^ffaa qabachuu fi hanga ammaatti namni ummata kanaa dirmatuu fi gidiraa inni keessa jiru baasee dubbatuuf dhibamuun ammoo mootummichi yakka isaa kana caalaatti akka itti fufu taasisee jira jechuun maddeen naannoo sadarkaa miidhama ummataa ifa godhu.

Baha Shaggar, Baha Wallaggaa fi Kibba Oromiyaa Onoota hedduu keessattis mootummaan PP WBO dhabamsiisuu akeeka jedhuun humna waraanaa guddaa, miliishotaa fi qaamota nageenyaa bifa adda addaan ijaare bobbaasuun miidhama guddaa ummata nagaa irraan gahaa akka jiru beekuun danda’ameera.

Tahe jedhamee meeshaalee gugurdoon waraana PPn fageenya irraa qe’ee ummataa keessatti dhukaafamaa jiru kan mootummichi maqaa dhahatee yakka raawwatu WBO rukutaa jira osoo hin taane, ummata nagaa homaa of harkaa hin qabne, meesha-maleeyyii fixaa, manaa fi qabeenya duraa mancaasaa jira jechuun maddeen keenya ifa godhu.

Yakki waraanaa mootummaa paartii PPn Lixa Shaggar keessatti raawwatamaa jiru, Baha Shaggar, Baha Wallaggaa fi Kibba Oromiyaa iddoo hedduu keessatti bifuma walfakkaatuun raawwatamaa jira kan jedhan maddeen keenya, ummatni keenya roorroo hamtuu, jiruu fi jireenya isaa keessatti argee hin beekne keessummeessaa jira jechuun hammeenyaa fi faashistummaa abbaa irree mootummaa PP ifa godhu.

Ummatni keenya kan keessaas kan alaas osoo hin hifanne, wal hin harcaasnee fi maal na dhibe utuu hin jenne, ummata qe’ee isaa keessatti itti roorrisamaa fi meeshaalee gugurdoo fi xayyaarota waraanaan dhumaa jiru kanaaf sagalee tahuu, miidhama isaa kana gurra hawaasa addunyaa buusuu, yakka sirnichaa saaxiluu jabaatanii akka itti fufan dhaamsa dabarsina.