Mootummaan Bilxiginnaa Haleellaa Qilleensa irraa Gujii Lixaa irratti raawwateen namootni baay’een ajjeefaman

Waxabajjii 01, 2024 guyyaa har’aa haleellaa qilleensa irraa mootummaan PP Kibba Oromiyaa Godina Gujii Lixaa Ona Malkaa Sooddaa ganda Baartaa irratti raawwateen namootni hedduun ajjeefamuu maddeen SBO mirkaneessaniiru. Kanneen keessaa maqaan namoota 4 kan nu dhaqqabe yoo tahu, isaanis:

1. Obbo Hasan Duubee
2. Obbo Mohaammad Abdoo
3. Obbo Mi’eessaa Duubee fi
4. Obbo Abdiyaa Quluu faa dha.

Gujii Bahaa fi Lixaa keessatti mootummaan Bilxiginnaa irra deddeebiin tarkaanfii qilleensa irraa gandeen ummataa irratti fudhataa tureen lubbuu ummata qulqulluu hedduu bal’eessuu, manneenii fi qabeenya ummataa mancaasuu gabaasaa turuun keenya ni yaadatama.

Kana malees waraanni PP, Raayyaa Ittisa Biyyaa (RIB) jedhaman WBO golgaa godhatuudhaan meeshaalee gugurdaa gandeen ummataa irratti roobsaniin lammiilee nagaa hedduu ajjeesanii, kaan qaamaa hir’isuun manneen hedduu barbadeessaniiru.

Godina kana keessatti hidhattootni sirnichaa, kaabinootnii fi bulchitootni waltahuudhaan ummata nagaatti bobba’anii “Shanee of keessaa baasaa” kan jedhuun ajjeechaa, hidhaa fi saamicha qabeenyaa bal’aa akka raawwataa turanii fi jiran gabaafameera.