𝐊𝐨𝐫𝐞𝐞𝐧 𝐅𝐚𝐧𝐧𝐨𝐨 𝐃𝐢𝐢𝐦𝐚𝐚 𝐈𝐝𝐢𝐥-𝐚𝐝𝐝𝐮𝐧𝐲𝐚𝐚 𝐈𝐭𝐨𝐨𝐩𝐡𝐢𝐲𝐚𝐚 𝐇𝐨𝐫𝐫𝐨𝐨 𝐆𝐮𝐝𝐮𝐫𝐮𝐮 𝐖𝐚𝐥𝐥𝐚𝐠𝐠𝐚𝐚𝐭𝐭𝐢 𝐍𝐚𝐦𝐨𝐨𝐭𝐚 𝐪𝐞’𝐞𝐞 𝐢𝐬𝐚𝐚𝐧𝐢𝐢 𝐢𝐫𝐫𝐚𝐚 𝐛𝐮𝐪𝐪𝐚’𝐚𝐧𝐢𝐢𝐟 𝐦𝐞𝐞𝐬𝐡𝐚𝐚𝐥𝐞𝐞 𝐦𝐚𝐧𝐚𝐚 𝐫𝐚𝐚𝐛𝐬𝐞

Koreen Fannoo Diimaa Idil-addunyaa Itoophiyaa, torban darbe meeshaalee manaa barbaachisoo ta’an maatii 3,310 (Namoota 16,550) qe’ee isaanii irraa buqqa’anii magaalaa Shaambuu qubataniif raabsuu isaa AddiStandard beeksiseera. Deeggarsi kun, Lixa Oromiyaa, Godina Horroo Guduruu Wallaggaa, Ona Jaardagaa Jaartee fi Amuruu gandoota 14 irraa kanneen buqqa’aniif kan raabsamu ta’uun ibsameera.

Weerarrii fi ajjechaan jumlaa finxaaleyyiin Amaaraa Faannoo fi waraanni mootummaa Bilxiginnaa maqaa “Shanee bal’eessuu” jedhuun ummata nagaa fi meesha-maleeyyii irratti geggeessan ammallee hin dhaabbatne.

Ajjechaan jumlaa murnoota kanaan ummata Oromoo godinoota kana keessa jiraatu irratti deemsisamaa jiru haalaan ulfaataa ta’uu ummatni iyyataa jira. Lubbuun namaa guyyuu akka baalaa harca’aa jira. Maanguddootni, daa’immanii fi hawwan kanneen dhumaa jiran keessaa isaan duraa ti. Kumoota kudhanootaan qe’ee fi qabeenya gatee baqataa jira ummatni kun.

Godinoota Horroo Guduruu Wallaggaa fi Wallagga Bahaa keessatti yakki hidhattootni Faannoo fi waraanni mootummaa ummata irraan ga’aa jiran yakka waraanaa fi duguuggaa sanyii ti.

Godinoota kanatti qaamotni walabaa fi miidiyaaleen dhaqanii haala qabatamaa jiru gabaasuu hin danda’iniif malee, dhumaatiin dhaqqabaa jiru, buqqaatiin ummata mudataa jiru, qabeenyi barbadaawaa fi saamamaa jiru kan amma dubbatamaa jiruun dachaan ol ta’uu kanneen baqatanii lubbuu ofii baafachuu danda’an ibsuu irratti argamu.

Dhumaatiin ummataa kun, yakki suukanneessaan kun garuu hawaasa addunyaa biraas, abbaa dhimmaa kan ta’e ummata Oromoo birattis hagas mara dhageettii fi dirmatnaa gama hundaa dhabuun garuu ummaticha haala ulfaataa keessatti kufee jiru kana gatii dachaa baasisaa jira; gaddisiisaadhas.

Addunyaan dhumaatii Tigraayi keessatti dhaqqabee fi dhaqqabaa jiru qofaaf gurra laattee jirti. Dhumaatiin Oromiyaan keessummeessaa jirtu, duguuggaan sanyii Oromoo irratti ta’aa jiru haalaan ulfaataa dha. Torban torbaniin lubbuun Oromoota qulqulluu 50 – 60 ba’aa jira. Dhageettii fi xiyyeeffannoo dhabuun ummata kanaa haalaan gaddisiisaa dha.

Oromoon dhimma jabduu akkasii moggaa kaa’ee waan bubutuun iyyaa oola. Xiyyeeffannoo fi dhimmi jabaan kana caalu hin jiru ture. Garuu haalli Oromoon keessa jiru qaanessaa dha.

Miidiyaan hawaasaa kanaaf xiyyeeffannoo hin laanne jette jettee fi huuba naannessaa oolu dhugaa ummata kanaa fi miidhaa isa irra ga’aa jiru balballoomsuuf maaf hin oolleen gaaffii hundaa ta’uu dha qaba.

Yo abbaan iyye ollaan dirmata. Lammii keenya dhumaa jiruuf, yo nuti tolchinee hin iyyinee fi hin hojjenne, alagaa fagoo dhimmi komannuuf hin jiru.