Obbo Raggaasaa Qopheessaa Du’aan Addunyaa Kana Irraa Boqotuu Ilaalchisee Ijoo Dubbii ABO – Onkoloolessa 27,2022

Obbo Raggaasaa Qopheessaa, Abbaan Miseensa SHG-ABO Jaal Abdii Raggaasaa dhukkubsatanii erga waldhaansa irra turanii booda, irraa fayyuu dadhabuun guyyaa har’aa Onkoloolessa 27,2022 boqotanii jiran.

Addi Bilisummaa Oromoo du’aan boqochuu Obbo Raggaasaa Qopheessaatti gadda itti dhaga’ame ibsataa, maatii, firootaa fi hiriyoota isaaniif jajjabina hawwa. Obbo Raggaasaan dhiibbaa fi ariisaan maatii isaanii irratti godhamu haala irraa hin dhaabbatin jiru keessatti kan har’a du’aan addunyaa kana irraa darban.

Obbo Raggaasaa Qopheessaa wayta dhukkubsatanii ciisaa turanittis ta’e, har’a wayta lubbuun isaanii darbu kanatti, ilmi isaanii Jaal Abdii Raggaasaa waggoota 3f bal’eessaa tokko malee, haqa dhabuun manneen hidhaa sirna mootummaa PP keessatti gidiraa argaa jira.

Jaal Abdiin yeroo abbaan isaa dhukkubsatan waldhaannachuu, jajjabeessuu fi yeroo du’an kanatti awwaallachuu dadhabuun ammoo haalaan nama laalessa.

Hireen akkasii kun amma duras hogganoota, qondaalotaa fi miseensota dhaaba keenya ABO deddeebi’ee kan mudataa ture yoo ta’u, hiraaraa fi gidiraa mana hidhaa keessaatti dabalataan du’a maatii ofii mana hidhaa keessatti dhaga’uun akkaan ulfaata.

Miseensi SHG-ABO Jaal Abdii Raggaasaa har’a mana hidhaa keessa taa’ee du’a Abbaa isaa dhaga’u, ofiifuu jireenya mana hidhaa hiraarsaa sana keessatti dhukkuba baatee nama jiraataa jiruu dha. Jaallan waliin hidhamee jiru hundis hiree walfakkaataa keessummeessaa jiran.

Addi Bilisummaa Oromoo hogganootni isaa seeraan ala hidhamanii fi haqa waakkatamuun hidhaa keessatti hiraarsamaa jiran akka gadi-lakkisamaniif irra deddeebiin gaafataa ture; har’as itti jira.

Addi Bilisummaa Oromoo hoggana isaa Jaal Abdii Raggaasaa dabalatee, maatii Obbo Raggaasaa Qopheessaa, firootaa fi hiriyoota isaaniif irra deebi’ee jajjabina hawwaa, lubbuu Obbo Raggaasaa Qopheessaaf ammoo Waaqni Jannataan haa qananiisu jedha.

Injifannoo Ummata Bal’aaf!