𝐆𝐨𝐝𝐢𝐧𝐚 𝐇𝐨𝐫𝐫𝐨𝐨 𝐆𝐮𝐝𝐮𝐫𝐮𝐮 𝐖𝐚𝐥𝐥𝐚𝐠𝐠𝐚𝐚 𝐎𝐧𝐚 𝐀𝐦𝐮𝐫𝐮𝐮 𝐤𝐞𝐞𝐬𝐬𝐚𝐚 𝐮𝐦𝐦𝐚𝐭𝐧𝐢 𝐚𝐣𝐣𝐞𝐞𝐬𝐚𝐦𝐚𝐚 𝐟𝐢 𝐦𝐚𝐧𝐧𝐞𝐞𝐧𝐢𝐢 𝐟𝐢 𝐪𝐚𝐛𝐞𝐞𝐧𝐲𝐢 𝐛𝐚𝐫𝐛𝐚𝐝𝐚𝐚𝐰𝐚𝐚 𝐣𝐢𝐫𝐚.

Oduun naannoo sanaa ba’aa jiru akka hubachiisutti, hidhattootni mootummaa fi humni Faannoo walta’uudhaan Godina Wallagga Bahaa Ona Amuruu gandoota hedduu keessatti kaleessaa qabanii weerara bal’aa ummata irratti bananii kan jiran yoo ta’u, namootni baay’een du’aniiru; manneenii fi qabeenyis barbadaawaa jira.

Ona Amuruu gandoota Hagamsaa, Irroo, Somboo Kumii, Digaluu Sutee, Kattaa Alii fi kkf keessatti waraanni mootummaa uffata siviilii uffachuun humna Faannoon walta’ee nama ajjeesaa fi manneen gubaa jiru jechuun ifa godha oduun kun.

Guyyaa kaleessaa ollaa Amuruutti kan argamtu magaalaa guddoo Ona Jaardagaa Jaartee kan taate Aliboo weeraruun ummata nagaa irratti waraana bananiin lubbuun namoota baay’ee darbeera; manneenii fi qabeenyi hedduun hanga ammaa gubataa jira.

Humni waloo waraana mootummaa uffata siviilii uffatee fi Faannoo kaleessa magaalaa Aliboo barbadeessan har’a ganama irraa kaasanii toora Ushoo Barjiitti haleellaa fakkaataa ummata irratti bananii jiru.

Har’as ganamaan magaalaan gubachaa jira kan jedhan maddeen, eenyu akka du’ee fi jiru illee adda baasuun hin danda’amne erga jedhaniin booda, ummatni baay’inaan buqqa’aa akka jirus hubachiisu. Ummatni keenya hanga danda’e akka of baraaruufis dhaamsa dabarsaniiru.