US waliigalteen waraana dhaabuuf mootummaa Itoophiyaa fi humnoota Tigraay gidduutti taasifame kabajamuu mirkaneessuu fi sarbama mirgoota namoomaaf itti-gaafatamni akka jiraatu gochuuf, qoqqobbii fayyadamuu irraa duubatti hin deebitu jedhan aanga’aan olaanaa Isteet Dippaartimanti tokko.

Aanga’aan Isteet Dippaartimanti olaanaa maqaan isaanii hin eeramiin tokko akka ibsanitti, bu’uura waliigaltee mallattaa’een Ertiraa fi humnoonni biroo naannoo Tigraay keessa jiran hin ba’an taanaan Ameerikaan qoqqobbii kaa’uu dandeessi.

Yeroo ammaa kana waraanni Ertiraa akkasumas humnoonni Amaaraa fi Affaar Tigraay keessatti akka argaman kan himan aanga’aan US kun, waliigalteen mootummaan Itoophiyaa fi humnoonni Tigraay irra gahan humnoonni kunneen akka naannicha keessaa bahan kan gaafatu akka ta’e yaadataniiru.

Mootummaan Itoophiyaa fi humnoonni Tigrayy waliigaltee nagaa mallatteessan hojii irra oolchuudhaaf murannoo akka qaban dhaga’aa jirra kan jedhan aanga’aan Isteet Dippaartiment kun, waliigalteen nagaa kun akka hojii irra hin oolle warren gufuu ta’an garuu adabamuu akka danda’an ibsaniiru.

Waliigalteen nagaa kun akka kabajamuu fi hojii irra oolu, akkasumas sarbama mirgoota namoomaa warri raawwatan akka itti gaafataman gochuuf “qoqqobbii kaa’u irraa duubatti” hin deebinu jedhan.

Aanga’aan Olaanaa US Isteet Dippaartimen maqaan hin eeramne kun akka jedhanitti adeemsa waliigaltee nagaa Kaaba Itoophiyaa ilaalchisee wayta odeeffannoo gaazexeessitootaaf kennanitti ture kana kan jedhan.

Aanga’aan kun ibsa bilbilaan kennaniin adeemsa waliigaltee nagaa hojii irra oolchuu maal akka fakkaatuu fi amma maal irra akka jiru ibsaniiru.

Maddi: BBC