𝐁𝐚𝐫𝐚𝐭𝐭𝐨𝐨𝐭𝐧𝐢 𝐎𝐫𝐨𝐦𝐨𝐨 𝐌𝐚𝐧𝐧𝐞𝐞𝐧 𝐁𝐚𝐫𝐧𝐨𝐨𝐭𝐚𝐚 𝐆𝐚𝐫𝐚𝐠𝐚𝐫𝐚𝐚 𝐌𝐨𝐨𝐭𝐮𝐦𝐦𝐚𝐚 𝐁𝐢𝐥𝐭𝐬𝐢𝐠𝐢𝐧𝐧𝐚𝐚 𝐉𝐚𝐥𝐚𝐭𝐭𝐢 𝐃𝐮𝐠𝐮𝐮𝐠𝐠𝐚𝐚 𝐒𝐚𝐧𝐲𝐢𝐢 𝐔𝐦𝐦𝐚𝐭𝐚 𝐎𝐫𝐨𝐦𝐨𝐨 𝐈𝐫𝐫𝐚𝐭𝐭𝐢 𝐃𝐞𝐞𝐦𝐬𝐢𝐬𝐚𝐦𝐚𝐚 𝐉𝐢𝐫𝐮 𝐌𝐨𝐫𝐦𝐮𝐮𝐧 𝐅𝐢𝐧𝐜𝐢𝐥𝐚 𝐉𝐚𝐥𝐪𝐚𝐛𝐚𝐧 𝐈𝐭𝐭𝐢 𝐅𝐮𝐟𝐚𝐧𝐢𝐢𝐫𝐮.

Haaluma kanaan Mudde 05,2022 har’a Barattootni Oromoo magaalaa Naqamtee Daargee dabalatee manneen barnootaa adda addaa fi Qeerroon Bilisummaa Oromoo ajjechaa jumlaa humni goolessituu faannoo mootummaan hidhachiisamanii fi bobbaasaman lammiilee nagaa irratti raawwataa jiran akkasumas dhumaatii waraanni mootummaa Biltsiginnaa ummata Oromoo irraan ga’aa jiru mormuu fi balaaleffachuun hiriira diddaa dhoosanii jiran.

Barattootni Oromoo dhaabbilee barnootaa olaanoo fi sadarkaa 2ffaa hunda keessatti argaman, waliigalatti ammoo ummatni Oromoo kana caalaa taa’ee waan eegu hin qabu; salphinni kana caalus hin jiru waan ta’eef, gamtaan sagalee tokkoon, dhumaatii irraa of oolchuuf ka’ee falmatuu qaba jechuun yaamicha dhiheessaniiru.

Oduuma walfakkaatuun hiriirri mormii barattootaa fi Qeerroo Bilisummaa Oromoo manneen barnootaa hedduu keessatti guyyaa har’aa kan itti fufe yoo ta’u, godinoota Harargee fi Arsii manneen barnootaa hedduu keessatti mormiin sirna Biltsiginnaa ummata Oromoo lafa irraa fixaa jiru irratti gaggeeffamaa jiraachuu maddeen gabaasaniiru.

Dhaabbilee barnootaa keessatti nyaata lagachuun diddaa mul’isuunis geggeessamaa jira.

Barattootni Oromoo Yunversitii Haramaayaa fi Qeerroon Bilisummaa Oromoo Mudde 03,2022, ajjechaa, hidhaa, saamichaa fi waliigalatti dhumaatii jumlaa ummata Oromoo irratti geggeessamaa jiru balaaleffachuun sagalee diddaa dhageessisaniiru.

Barattootni Oromoo dhaabbilee barnootaa olaanoo fi sadarkaa garagaraa irra jiran ummata keenya haala mul’atee hin beekneen dhumaa jiruu fi Oromiyaa dhabamaaf geessee jirtu baraaruu fi sagalee waliif ta’uuf gamtaan waliin kaanee haa hiriirru jechuun yaamicha gochuun isaanii kan yaadatamuu dha.

Barattootni Sadarkaa 2ffaa Abuunaa kumaan lakkaawwamanis haala hamtuu keessa taa’aanii barachuun itti ulfaannaan, ummata Oromoo guutuu Oromiyaatti dhumaa jiruuf, mufaatii fi aariin mormii fi fincilaa dhaggeesisuuf yaalaniiru.

Hedduun isaanii Sadaasa 27, 2022 ykn ALItti gaafa 18/03/2015 barnoota addaan kutanii gara mana jireenyaa isaaniitti kan galan yoo ta’u, barattoota Oromoo guutuu Oromiyaa keessaa baratan Sadarkaa 2^ffaa fi Yunvarsitiileen hundi gamtaan akka waldhagahuun ka’anii falmatan waamicha dabarsanii jiran.