Noorweey lammiileen ishee gara Itoophiyaa akka hin imalle hubachiifte

Mootummaan Noorwey lammiileen biyyattii gara kutaalee Itoophiyaa bal’aa haalli nageenyaa isaanii hin mirkanoofnetti akka hin imalle gorse.

Ministeerri Dhimma Alaa Noorwey ibsa Mudde 17,2022 baaseen lammiileen Noorwey gara Lixa Oromiyaa fi bakkeewwan birootti akka hin imalle hubachiiseera jechuun SchengenVisaInfo.com gabaaseera.

Imalli gara naannoolee Lixa Oromiyaa walitti bu’iinsaan miidhaman hundatti akka hin taasifamne gorsa. Kunis Godinoota Qeellam Wallaggaa, Wallagga Lixaa, Buunnoo Baddallee, Wallagga Bahaa, Horroo Guduruu Wallaggaa, Naannolee Gaambeellaa fi Benishaangul Gumuz ni dabalata jedha ibsi Ministeera Dhimma Alaa Norwey kun.

Akka Ministeerri Dhimma Alaa biyyattii jedhutti marii qaamolee wal waraansa irra turan gidduutti taasifamee fi waliigalteen dhukaasa dhaabuu irra ga’ame, haalli Kaaba Itoophiyaa akka fooyya’uuf gumaacha kan taasise ta’us, naannoo Tigraayitti garuu amma illee haalli jiru kan mirkanaa’e miti. Kana malees jeequmsi Baha Itoophiyaa fi gara daangaa Somaaliyaatti uumame naannolee kanneeniif illee haala nageenya hin qabne uumeera.

Haaluma kanaan lammiileen Norwey gara naannoo Tigraay, akkasumas bakkeewwan daangaa naannoolee Amaaraa, Tigraay fi Affaar dabalatee gara iddoowwan haala nageenyi isaanii hin mirkanoofneetti akka hin imalle Ministeerichi hubachiiseera.

Maddi: AS