𝐆𝐢𝐝𝐝𝐚𝐚 𝐀𝐲𝐲𝐚𝐚𝐧𝐚𝐚𝐭𝐭𝐢 𝐇𝐚𝐥𝐞𝐞𝐥𝐥𝐚𝐚 𝐇𝐚𝐚𝐫𝐚𝐚 𝐑𝐚𝐚𝐰𝐰𝐚𝐭𝐚𝐦𝐞𝐞𝐧 𝐍𝐚𝐦𝐨𝐨𝐭𝐧𝐢 𝟏𝟐 𝐀𝐣𝐣𝐞𝐞𝐬𝐚𝐦𝐮𝐮 𝐁𝐁𝐂𝐧 𝐆𝐚𝐛𝐚𝐚𝐬𝐞.

Godina Wallagga Bahaa Ona Giddaa Ayyaanaatti haleellaa haaraa tibbana humna goolessituu/finxaaleyyii Amaaraan raawwatameen lammiileen Oromoo 12 ajjeesamuu BBCn qondaala bulchiinsa naannoo sanii waabeffachuun gabaaseera.

Haleellaan kun kan raawwatame erga torban lamaan dura waraanni mootummaa naannoo sana seenanii as ta’uu BBCn hubachiiseera.

Haleellaan kun gandoota sadii Ona Kiiramuu daangessanitti Kibxata darbe raawwatamuu qondaala onichaa waabeffachuun kan gabaase BBCn, haleellaa kanas kan raawwate hidhattoota Amaaraa finxaaleyyii/goolessitoota faannoo ta’uu qondaalli kun himuu ifoomseera.

Gama biraan waraanni mootummaa naannoo kanatti sochoosame jedhamu nageenya lammiilee Oromoo eeguun hafnaan ofiifuu maqaa “Shanee” jedhuun namoota nagaa manaa gadi baasee ajjeesaa jiraachuu maddeen gabaasaniiru.

Finxaaleyyiin Amaaraa Faannoo jedhamanis Godinoota Wallagga Bahaa fi Horroo Guduruu Wallaggaa keessaa kan hin ba’in jiran ta’uu fi inumaayyuu caalaatti humna isaanii jabeeffataa, Onootaa fi gandoota adda addaa keessa faca’anii balaa dhaqqabsiisaa, humni dabalataas Bulchiinsa Naannoo Amaaraa irraa itti ergamaa akka jiru kanneen keessa beekan hubachiisaniiru.

Weerara humni waloo finxaaleyyiin Amaaraa fi waraanni mootummaa Godinoota Wallagga Bahaa fi Horroo Guduruu Wallaggaa irratti adeemsisaniin lammiileen Oromoo dhibbootaan ajjeesamuu, kumoota dhibbaan qe’ee irraa buqqa’anii dirree irratti faca’uu fi qabeenyi ummata kanaa tilmaamuun hin salphanne manca’uun ni beekama.