𝐐𝐨𝐧𝐝𝐚𝐚𝐥𝐥𝐢 𝐀𝐝𝐝𝐚 𝐁𝐢𝐥𝐢𝐬𝐮𝐦𝐦𝐚𝐚 𝐎𝐫𝐨𝐦𝐨𝐨 𝐉𝐚𝐚𝐥 𝐆𝐚𝐝𝐚𝐚 𝐆𝐚𝐛𝐛𝐢𝐬𝐚𝐚 𝐃𝐡𝐢𝐛𝐞𝐞 𝐓𝐢𝐫𝐮𝐮 𝐈𝐬𝐚 𝐌𝐮𝐝𝐚𝐭𝐞𝐞𝐧 𝐀𝐦𝐦𝐚𝐬 𝐌𝐚𝐧𝐚 𝐇𝐢𝐫𝐚𝐚𝐫𝐬𝐚𝐚 𝐊𝐞𝐞𝐬𝐬𝐚𝐭𝐭𝐢 𝐑𝐚𝐤𝐤𝐚𝐜𝐡𝐚𝐚 𝐉𝐢𝐫𝐚.

Qondaalli Adda Bilisummaa Oromoo Jaal Gadaa Gabbisaa Dhibee Tiruu Isa Mudateen Ammas Mana Hiraarsaa Keessatti Rakkachaa Jira.

Miseensota, Qondaalotaa fi Hoogganoota ABO waggoota sadii (3)f yakka tokkoon alatti ejjannoo siyaasaa isaaniif qofa murna aangoo siyaasaa dhuunfateen manneen hidhaa garagaraa keessatti hiraarfamaa turanii fi jiran keessaa Jaal Gadaa Gabbisaa isa tokko.

Jaallan Miseensota ABO hedduun fayyaa isaanii iddoo qubannaa isaanii irraa fuudhamanii manneen hidhaa keessatti dhibeef saaxilamuun rakkoo hamaaf affeeramaniiru. Jaal Gadaanis jaallan nagahaan manaa fuudhamee dhibeef saaxilame keessaa ti.

Jaal Gadaan kanaan dura mana hidhaa keessatti dhukubsachuun mana wal’aansaas dhoowwamee dhibeen isaa wayta itti hammaatu xumura irratti mana wal’aansaatti geeffamee ilaalamuun, gaafa Ebla 08,2022tti ragaan qorannoo Hospitaalaa guyyoota 20f taasifame akka mul’isetti Dhibee tiruu gosa #Hepatitis Viral Positive ta’e sadarkaa baay’ee yaaddessaa irra kan jiruun qabamuu isaatu baramee ture.

Ammas Jaal Gadaan dhibee isa mudate sanaaf mana hidhaa keessa taa’ee wal’aansa gahaa waan dhabeef, dhibichi itti hammaatee guyyaa har’aa Muddee 30,2022 ilaalamuuf mana wal’aansaa geessanii dhibeen Tiruu duraan isa mudate sun daran akka itti hammate ragaa mana wal’aansaa ni mul’isa.

Dhibee Jaal Gadaa Mudateen wal qabatee, Jaallan Jaal Gadaa waliin mana hidhaatti hiraarfamaa jiranii fi maatiin Jaal Gadaa haalli fayyummaa isaa hedduu nu yaaddesseera, wal’aansa barbaachisu argachuu dhabuun osoo arginuu Jaallii kun akka nu harkatti hin duuneef Oromoon sagalee tahuufii qaba jechuun ergaa isaanii SBOf dabarsaniiru.

Haaluma walfakkatuun, kanaan duras jaallan miseensota, Qondaalotaa fi hoogganoonni manneen hidhaa garagaraa keessatti dhibeen akka rakkataa turan, addatti Jaal Battee Urgeessaa dhibee fakkataa Jaal Gadaa kanaan mana hidhaa keessatti qabamuun hubaatii yeroo dheeraa booda hidhaa irraa hiikamuun wal’aansa argateen dhibee isa mudate irraa dandamatuu gabaasaa turuun keenya ni yaadatama.