Ebla 15 Guyyaa Gootota Wareegamtoota Oromoo Ilaalchisee Dhaamsa ABO

Gumaan Goototaa Milkaa’uu Qabsoo Bilisummaa Oromoon Baafama!

Ebla 15 Guyyaa Gootota Wareegamtoota Oromoo Ilaalchisee Dhaamsa ABO

Miseensotaa fi deggertoota ABO, qabsaawotaa fi sab-boontota ilmaan Oromoo hundaa, waliigalatti ummata Oromoo bal’aa, baga Ebla 15 Guyyaa Gootota Wareegamtoota Oromoo kan bara kanaa 2026’n isin gahe, nuun gahe jenna.

Guyyaan Goototaa Ebli 15, guyyaa goototni lubbuu isaanii jijjiirraa hin qabnee fi kennaa hundaa olii mararfatnaan alatti, harqoota gabrummaa caabsuuf, kabajaa sabummaa deebisuuf, Bilisummaa argamsiisuuf, biyya dhabne mul’isuuf, mirga Oromoof osoo falmanii lubbuu isaanii dabarsanii kennan kan itti yaadatnu waan ta’eef, guyyaa ulfaataa fi kabajamaa dha.

Bu’aa bayii qabsoo bilisummaa Oromoo keessatti qabsaawotni qaqqaaliin kufanii qabsoo fuul-duratti tarkaanfachiisaniiru. Xurree qabsoo dhiigaan tattaraaranii dabraniiru. Sabummaa Oromoo dhabama irraa hambisuuf, Oromiyaa har’a lafa irra jirtu argamsiisuuf, waliigalatti mirgootaa fi injifannoolee har’a Oromoon gonfate fiduuf, goototni ilmaan sabaa, ilmaan biyyaa, qarayyoon, kutatoo fi muratoon kumaatama hedduun maqaa isaanii waamanii fixuun hin danda’amne qabsoo bilisummaa Oromoo ABOn durfamu keessatti hiriiranii wareegama lubbuu qaalii baasaniiru. 

Hoogganoota dhaabichaa irraa hanga miseensotaa fi deeggartootaatti, seenaa boonsaa hojjetanii kanneen saba isaanii bilisummaa gonfachiisuuf lubbuu isaanii aarsaa godhan kumaa fi kitila dha. Kunneen hundi akka urjiitti galmee seenaa keessaa ifaa jiraatu. Bara baraanis dhalootaan yaadatamu.

Wareegamni 𝐒𝐡𝐢𝐧𝐢𝐠𝐠𝐚𝐚 bara 1980 seenaa qabsoo bilisummaa Oromoo keessatti kan iddoo olaanaa qabuu fi yaadannoo addaa sammuu qabsaawotaa fi ummata keenyaa keessatti hambisee darbee dha.

Guyyaa san qabsaawota angafootaa fi hoogganoota ol’aanoo ABO kan Hayyu-Duree fi Itti Aanaan keessatti argaman namoota 10 tahantu haala akkaan rifaasisaa taheen wal faana bakka tokkotti wareegame.

Wareegama sana hunda caalaa kabajamaa fi yaadatamaa kan taasise akkaataa Jaallan keenya sun murannoo ol’aanaadhaan itti wareegamanii dha. 𝘼𝙢𝙖𝙣𝙩𝙞𝙞𝙙𝙝𝙖𝙖𝙣 𝙜𝙖𝙧𝙜𝙖𝙧 𝙦𝙤𝙤𝙙𝙖𝙣𝙞𝙞 𝙧𝙪𝙠𝙪𝙩𝙪𝙪𝙛 𝙨𝙝𝙞𝙧𝙖 𝙙𝙞𝙞𝙣𝙤𝙩𝙖𝙖𝙣 𝙭𝙖𝙭𝙖𝙢𝙚 𝙙𝙞𝙙𝙖𝙣𝙞𝙞 𝙂𝙪𝙧𝙢𝙪𝙪 𝙏𝙤𝙠𝙠𝙪𝙢𝙢𝙖𝙖 𝙛𝙞 𝘽𝙞𝙡𝙞𝙨𝙪𝙢𝙢𝙖𝙖 𝙎𝙖𝙗𝙖 𝙞𝙨𝙖𝙖𝙣𝙞𝙞𝙛 𝙬𝙖𝙖𝙙𝙖𝙖 𝙬𝙖𝙡𝙞𝙞𝙣 𝙨𝙚𝙚𝙣𝙖𝙣 𝙞𝙧𝙧𝙖𝙩𝙩𝙞 𝙬𝙖𝙡𝙞𝙞𝙣 𝙘𝙞𝙘𝙝𝙖𝙣𝙞𝙞 𝙝𝙖𝙙𝙝𝙖𝙖 𝙙𝙪’𝙖𝙖 𝙬𝙖𝙡𝙞𝙞𝙣 𝙪𝙣𝙖𝙩𝙖𝙣𝙞𝙞 𝙗𝙤𝙤𝙡’𝙖 𝙩𝙤𝙠𝙠𝙤𝙩𝙩𝙞 𝙖𝙬𝙬𝙖𝙖𝙡𝙖𝙢𝙪𝙪 𝙞𝙨𝙖𝙖𝙣𝙞𝙞 𝙩𝙞. Kun Ebli 15 Guyyaa Gootota Wareegamtoota Oromoo tahee bara baraan akka yaadatamuuf sababa tahe.

Ebli 15 Guyyaa Gootota Wareegamtoota Oromoo tahee akka yaadatamu ABOn wayta murteessetti, miseensota dhaabaa wareegaman ittiin yaadatuu qofaaf akka hin taane deddeebisnee wal yaadachiisna. Ilmaan Oromoo kanneen ummata Oromoo gabroomfatuuf itti duulan osoo ittisanii kufan, roorroo fi hacuuccaan itti hammaatuu irraa sirna bittaa alagaa bifa garagaraan osoo faccisanii lubbuu isaanii kennan, kanneen gabrummaan booda, bakkoota adda addaatti ummata Oromoo irraa waanjoo gabrummaa kaasuun akka sabaatti mirgi qabu kabajameefii jiraatuu qabaatti amanuun sirna gabroomfataa irratti osoo qabsa’anii wareegaman marti akka ittiin yaadatamaniif  Ebli 15 Guyyaa Goototaa tahee akka yaadatamu murteesse.

Ummatni Oromoo Biyyaa fi Bilisummaa isaatiif jecha wareegamni baase guddoo ulfaataa tahuun hin falamsiisu. Gabrummaa jalatti miidhaan dorgomaa hin qabne irra gahuu fi wareegamni itti heddummaatus waldhaansoo qabuu hin dhaabne. Sababa sirna cunqursaa fi cunqurfamuu diddaaf, Bilisummaa isaaf wareegama baasuu itti fufee jira.

Ilmaan Oromoo hedduun qabsoo bilisummaatiif qaamaa hir’atanii, hedduunis maatii fi qabeenya isaanii itti dhabaa jiru. Xiqqaa guddaan Oromoo, murnootni hawaasaa cufti sababaa kaayyoo qabsoo kanaaf aarsaa lubbuu olaanaa, hanga dhabamuu maatiitti gatii kafalan, wareegamtootni kaayyoo marti isaaniituu galmee seenaa keessaa ifanii mul’atan. Gumaa isaanii kan baasus milkaa’uu kaayyoo isaan irratti wareegama lubbuu baasanii dha.   

Ebla 15 Guyyaa Gootota Wareegamtootaa wayta kabajannu wareegamtoota  keenya yaadataa, irbuu keenyas haaromsatuun kaayyoo isaan irratti wareegaman galiin ga’uuf qabsaawotni, miseensotnii fi deggertootni ABO rakkinoota haalotni maddisiisan kamiif iyyuu osoo hin jilbeenfatin jabaattanii hojii qabsoo akka itti fuftan ABOn dhaamsa isaa isiniif haaromsa.

Ilmaan Oromoo gaaffii haqaa saba Oromoo kan bilisummaa fi mirga abbaa biyyummaatti amanan hundi, akka waliigalaatti ammoo ummatni Oromoo galma gahiinsa qabsoo bilisummaa Oromoo dhugoomsinee wareegama gootota keenyaatti firii gochuudhaan gumaa isaanii Bilisummaadhaan baasuuf bakka jirru hundaa hojii qabsoo haa finiinsinuun dhaamsa keenya.

Kabajaa Guyyaa Gootota Wareegamtoota Oromoo baranaa (2026) kan adda godhu wayta ABOn qabsoo karaa nagaa geggeessaa jiru keessatti yeroo duraatiif filannoo marsaa 7^ffaa Itoophiyaa keessatti geggeeffamuuf jiru irraa qooda fudhatuuf murteessee sossohaa jiru keessatti. Murtii kanaanis saba keenyaaf nagaa argamsiisuuf, daandii kanaanis kaayyoo qabsoo bilisummaa Oromoo kan wareegamtootni ilmaan Oromoo kumaa kitilli irratti kitimaman osoo hin sharafin milkeessuuf carraaqqii olaanaa haala godhaa jiru keessatti. 

Hojii dhaabaa kana milkeessuuf miseensotni, qabsaawotnii fi deggertootni ABO kan duraanii caalaatti jabaattanii hojjechuu, didhaalee mudatan kamuu irra aanuuf qophaa’uu fi karaa hundumaan dhaaba keessaniif jirra jechuun awwaachuun amma jenna.

Waliigalatti ummatni Oromoo bal’aan nagaa waaraa argachuuf, bilisummaa dhugaa gonfachuuf, mirga hiree murteeffannaa fi abbaa biyyummaa mirkaneeffachuuf, dimokraasii fi walqixxummaaf akkasumas guddina waloof, dhaaba keessan kan ilmaan keessan keessatti hiriiruun mirga keessaniif osoo falmanii gatii lubbuu qaalii itti kafalan ABO akka filattan hiree kanaan yaamicha keenya isinii dabarsina.

ABO filachuun, kaayyoo qabsoo bilisummaa Oromoo kan goototni ilmaan saba keenyaa bakkaan ga’uuf osoo warraaqanii irraa kufan milkeessuu waan ta’eef, ABO filadhaan dhaamsa keenya.

Ebli 15 Guyyaa Gootota Wareegamtoota Oromoo ti!

Goototni Wareegamtootni Oromoo Bara Baraan Ni Yaadatamu!, Ni Faarfamu!

Kabajaa fi Ulfinni Wareegamtoota keenyaaf!

Injifannoo Ummata Bal’aaf!

Adda Bilisummaa Oromoo

Ebla 14, 2026

Finfinnee