𝐌𝐨𝐨𝐭𝐮𝐦𝐦𝐚𝐚𝐧 𝐁𝐢𝐥𝐱𝐢𝐠𝐢𝐧𝐧𝐚𝐚 𝐦𝐚𝐪𝐚𝐚 𝐖𝐁𝐎𝐟 𝐧𝐲𝐚𝐚𝐭𝐚 𝐥𝐚𝐚𝐭𝐭𝐚𝐧, 𝐝𝐞𝐠𝐠𝐞𝐫𝐭𝐚𝐧 𝐣𝐞𝐝𝐡𝐮𝐮𝐧 𝐮𝐦𝐦𝐚𝐭𝐚 𝐧𝐚𝐠𝐚𝐚 𝐡𝐢𝐝𝐡𝐮𝐮 𝐟𝐢 𝐪𝐚𝐛𝐞𝐞𝐧𝐲𝐚 𝐬𝐚𝐚𝐦𝐮𝐮 𝐣𝐚𝐛𝐞𝐞𝐬𝐬𝐞𝐞 𝐢𝐭𝐭𝐢 𝐟𝐮𝐟𝐞𝐞𝐫𝐚.

Godina Lixa Shaggar Ona Amboo ganda Xulee keessatti mootummaan Bilxiginnaa ummata nagaan WBOf nyaata laattan, tumsa gootaniif ittiin jechuun dubartoota dabalatee namoota hedduu mana hidhaatti guuraa fi qabeenya isaaniis saamaa jira.

Haaluma kanaan Obbo Biqilaa Kafanii jalaa mi’a mana keessaa hunda konkolaataatti fe’achuun oggaa duraa saaman, haadha warraa isaa Aadde Qananii Baay’isaa mucaa ishee ji’a hin guutne waliin akkasumas Aadde Bashuu Shabburaa jedhaman hidhanii jiran. Kana malees bulchiinsi mootummaa Bilxiginnaa magaalaa Ambootti kan argamu mana Obbo Biqilaa Kafanii kutaa 12 boorrataan (Doozaaraan) jalaa diiguu isaanii maddeen keenya gabaasaniiru.

Obbo Geetaachoo Galaanaa kan jedhaman jalaa mi’a mana keessaa guutuutti yeroo jalaa fe’atan, haadha manaa isaa Aadde Dammee Addisuu duraa hidhuu maddeen keenya dabaluun ifa godhaniiru.

Obbo Caalaa Fayyeeraa kan jedhaman jalaa ammoo mi’a mana keessaa alatti gadi guuruun mana isaa erga gubanii barbadeessanii booda, haadha warraa isaa Aadde Caaltuu Bokonaa duraa hidhuu maddeen keenya ifa godhu.

Kana malees, maanguddoo biyyaa kan ta’an Obbo Damisee Immiruu fi haadha warraa isaanii Aadde Zawudituu Guddataa jedhamanis qabanii akka hidhan ibsameera.

Akkasumas Aadde Xuuree Haayiluu fi haadha daa’ima haraasaa Aadde Warqituu Ilaalii jedhaman qabanii hidhuun hiraarsaa akka jiran maddeen keenya ifa godhu.

Namootni maqaa WBOf nyaata laattanii fi tumsa gootaniif jedhamuun mootummaa Bilxiginnaan qabaman kunniin yeroo ammaa magaalaa Amboo keessatti hidhamanii gidirsamaa akka jiran beekuun danda’ameera.

Sirni Bilxiginnaa dubartoota daa’imman waliin akkasumas jaarolee biyyaa hidhaatti guuruun yakka suukanneessaa hawaasa Oromoo irratti raawwatu itti fufee jira.