𝐋𝐚𝐦𝐦𝐢𝐢𝐥𝐞𝐞𝐧 𝐎𝐫𝐨𝐦𝐨𝐨 𝟏𝟔 𝐍𝐚𝐚𝐧𝐧𝐨𝐨 𝐒𝐡𝐚𝐰𝐚𝐚 𝐑𝐨𝐨𝐛𝐢𝐭𝐢𝐭𝐭𝐢, 𝐀𝐤𝐤𝐚𝐬𝐮𝐦𝐚𝐬 𝐎𝐧𝐚 𝐇𝐚𝐫𝐱𝐮𝐦𝐦𝐚𝐚 𝐅𝐮𝐫𝐬𝐞𝐞𝐭𝐭𝐢 𝐍𝐚𝐦𝐨𝐨𝐭𝐧𝐢 𝟐𝟖 𝐇𝐢𝐝𝐡𝐚𝐭𝐭𝐨𝐨𝐭𝐚 𝐀𝐦𝐚𝐚𝐫𝐚𝐚𝐧 𝐀𝐣𝐣𝐞𝐞𝐬𝐚𝐦𝐮𝐮𝐧 𝐝𝐡𝐚𝐠𝐚’𝐚𝐦𝐞.

Hidhattootni naannoo Amaaraa ajjechaa jumlaa lammiilee Oromoo nagaa irratti raawwatan kan itti fufan yoo ta’u, guyyaa har’aa Amajjii 23,2023 Shawaa Roobititti dhihoo kan ta’e bakka Karra Jajjabaa jedhamutti ilmaan Oromoo siviilii 16 waraqaa eenyummaa isaanii erga ilaalanii booda, konkolaataa irraa buusanii akka ajjeesan oduun SBO dhaqqabe ifa godha.

Sabboonaan Oromoo hawaasa keessatti beekamaa ta’an Sheek Amiin Aliyyii Sheek Mohaammad jedhaman kanneen ajjeesaman keessatti akka argaman beekuun danda’ameera.

Karra Jajjabaan daangaa Shawaa Roobitii fi Jiillee Dhummuuggaa irratti kan argamuu dha.

Amajjii 21,2023 irraa qabee hidhattootni naannoo Amaraa fi humni Faannoo walta’uudhaan meeshaalee waraanaa hammayyaawaa hidhatuun Oromoo Kaaba Oromiyaa Godina Walloo irratti waraana bananii jiran.

Godina Walloo Ona Jiillee Dhummuuggaa gandoota Haxaayyee, Gubbaa Waaccuu, Hallaala, Diric, Qundee, Mararrer, Jawwahaa, Nageesso, Baalcii, Wasan Ququrii fi Karra Jajjabaa akkasumas Ona Sambatee gandoota garagaraa keessatti hidhattootni Amaaraa/Faannoo ummata Oromoo irratti lola bananiin lubbuu ummata siviilii hedduu baasaniiru.

Haaluma walfakkaatuun Amajjii 21,2023 Ona Harxummaa Fursee bakka Harawaaca jedhamutti humnootni goolessitoota Amaaraa ummata keenya irratti weerara bananiin namootni 7 yeroo ajjeesaman, 12 ammoo madaa’uu oduun arganne ifa godha.

Guyyaa har’aa Amajjii 23,2023ttis hidhattootni Amaaraa kunniin ummata meesha-maleeyyii irratti waraana geggeessaniin namoota 21 ajjeesuu isaanii oduun SBO dhaqqabe ni hubachiisa. Manneen ummataas qabeenya waliin gubanii barbadeessaa akka jiran ibsameera.

Weerara hidhattootni naannoo Amaaraa/Faannoo Oromoota Walloo irratti bananii jiraniin guyyoota sadii gidduutti lammiilee siviiliin 44 ol ta’an lubbuu isaanii dhabaniiru.