Godina Wallagga Bahaa Irraa Kan Buqqa’an Lammiileen Oromoo Rakkoo Hamtuu Keessa Akka Jiran Ibsame.

Sababa weerara humna finxaaleyyii naannoo Amaaraa Faannoo jedhamaniin lammiileen Oromoo Godina Wallagga Bahaa irraa buqqa’an rakkoo hamtuu keessatti argamu. Bulchitootni sirna Bilxiginnaa nageenyi Godina Wallagga Bahaa osoo hin mirkanaa’in ummata buqqa’e qe’eetti deebisuuf dhiibbaa godhaa jiran.

Haala ummatni kun keessa jiru irratti tibbana gabaasa kan dhiheesse Addis Standard, lammiileen haleellaa Godinoota Giddaa Ayyaanaa fi Kiiramuu keessatti raawwatameen qe’ee isaanii irraa buqqa’anii magaalaa Giddaatti baqatan hanqina nyaataa fi tajaajila waldhaansaa dhabuun haala hamtuu keessatti argamuu isaanii mirkaneesse.

Ji’a tokko ykn lama keessatti daakuun kiiloon 25 maatii tokkoof akka kennamu, tajaajilli bishaan qulqulluu akka hin jirre, lagaa akka waraabbatan ykn kan danda’u bitee akka fayyadamu, tajaajilli fayyaa akka hin jirre baqattoota magaalaa Giddaatti argaman irraa akka odeeffate kan gabaase Addis Standard, irra caalaan buqqaatotaa daandii irra akka jiraatan, halkan halkan ammoo balbala namaa irra akka ciisan yaada buqqaatotaa kana waabeffachuun ifa godha.

Lammiilee Oromoo kuma 30 ol ta’an magaalaa Giddaatti argaman rakkoo gaaga’ama namoomaa hamtuu keessatti argamuu isaanii ji’a Muddee darbe keessa gabaasuu kan yaadachiise Addis, bulchaan Ona Giddaa Ayyaanaa Obbo Ijjiguu Guddataa lammiileen Oromoo 22,000 ol ta’an kan Ona Kiiramuu fi 13,000 kan gandoota Ona Giddaa Ayyaanaa jalatti argaman keessaa buqqa’an magaalaa Giddaa keessatti akka argaman miidiyichaaf ibsuu addeessa.

Bulchitootni Bilxiginnaa Godina Wallagga Bahaa gargaarsi karaa Onaatiin akka kennamu murtaawe kan jedhuun buqqaatotni Ona Kiiramuu irraa gara magaalaa Giddaatti baqatan gara Ona isaaniitti akka deebi’aniif dhiibbaan godhamu illee, ummatni kun rakkoon nageenyaa ammallee furmaata hin argatin jiraachuu irraa gara qe’ee isaaniitti deebi’uu sodaatuun achumatti rakkoof saaxilamanii jiran.

Bulchitootni Onoota Godina Wallagga Bahaa haala rakkoo nageenyaa weerara humna finxaaleyyii Amaaraa Faannoo osoo furmaata itti hin godhinii fi haala weerarichaatti xumura osoo itti hin godhin ummata ajjechaa jumlaa jalaa dandamatee baqate kanaan Ona keessanitti deebitan malee gargaarsa malu hin argattan jechuun dhiibbaa godhanis, ummatni garuu rakkoon nageenyaa jiraachuu himuun, gara Ona Kiiramuus ta’e iddoo birootti deebi’uu kan hin barbaadne ta’uu dubbataa jira.

Rakkoon nageenyaa ture osoo hin furamin gara ganda irraa buqqa’aniitti deebi’uun rakkoo biraaf akka isaan saaxilu, nageenyi naannoo amansiisaa akka hin taane, erga humnootni mootummaa iddoo gadi lakkisanii booda, hidhattootni Faannoo deebi’anii dhufuun haleellaa marsaa biraa eegaluu waan isaan dhorku hin jiru jechuun lammiileen Oromoo Ona Kiiramuu irraa buqqa’anii magaalaa Giddaatti argaman ifoomsaniiru.

Hanga ammaatti mootummaan nageenya godinichaa deebisee mirkaneessuu akka hin danda’in jiru kan dubbatan buqqaatotni kunniin, haala kana keessatti akka nuti gara Ona Kiiramuutti deebinuuf dhiibbaan nu irratti godhamaa jiru guddaa dha jechuun yaada isaanii Addis Standardiif ibsaniiru.

Goolessitoota Faannoon, qabeenyi isaanii akka saamamee fi barbadaawe, manneen akka duraa gubatan, midhaan lafa qonnaa irratti ibiddi itti qabsiisamee akka barbadaawee fi loowwan akka duraa saamame kan dubbatan lammiileen Oromoo Ona Kiiramuu irraa buqqa’an kunniin, haleellaa humni finxaaleyyii Faannoo Sadaasa 25 fi 29 Ona Kiiramuu keessatti raawwataniin namootni hedduun ajjeesamuu fi jiraattotni Ona Kiiramuu guutummaatti buqqa’uu yaadachiisaniiru.

Gargaarsi namoomaa ummata qe’ee ofii irraa sababa weerara humna alagaan qe’ee isaanii irraa buqqa’anii dirree irratti faca’an kanaaf godhamaa jiru kan barbaadamuun gadi ta’uu garuu bulchitootni kunniin hin dhoksine; dhaabbattootni mootummaa fi dhuunfaa gargaarsa cimsanii akka itti fufan gaafachuu isaaniis Addis Standard gabaaseera.

Akka odeessi tibbana ba’aa jiru hubachiisutti, finxaaleyyiin naannoo Amaaraa Faannoo jedhaman Baha Wallaggaa fi Horroo Goduruu Wallaggaa irraan haleellaa biraa ummata irratti fudhatuuf qophii fi sochii tokko tokko godhaa jiran. Kana waan ta’eef, ummatni Oromoo dammaqinaan of eeguu fi haalota jiran hordofuu qaba jechuun dhaamsa darbeefii jira.