𝗚𝗼𝗱𝗶𝗻𝗮 𝗕𝗼𝗼𝗿𝗮𝗻𝗮𝗮𝘁𝘁𝗶 𝗾𝗮𝗯𝗲𝗲𝗻𝘆𝗮 𝗟𝗼𝗼𝗻𝗶𝗶 %𝟭𝟬 𝗯𝗮𝗿𝗮𝗮𝗿𝘂𝘂𝗳 𝗺𝗮𝗿𝗴𝗶 𝗯𝗲𝗲𝗹𝗶𝗶 𝗺𝗶𝗹𝗶𝘆𝗼𝗼𝗻𝗮 𝟰.𝟰 𝗼𝗹 𝗮𝗸𝗸𝗮 𝗯𝗮𝗿𝗯𝗮𝗮𝗰𝗵𝗶𝘀𝘂 𝗵𝗶𝗺𝗮𝗺𝗲; 𝗕𝘂𝗹𝗰𝗵𝗶𝗶𝗻𝘀𝗶 𝗡𝗮𝗮𝗻𝗻𝗼𝗼 𝗛𝗮𝗿𝗮𝗿𝗶𝗶 𝗱𝗲𝗴𝗴𝗲𝗿𝘀𝗮 𝗴𝗼𝗰𝗵𝘂𝘂𝗳 𝗺𝘂𝗿𝘁𝗲𝗲𝘀𝘀𝗲.

Godina Booranaatti qabeenya Loonii % 10 baraaruuf margi beelii miliyoona 4.4 ol akka barbaachisu Bulchiinsi Godinichaa beeksisuu maddeen gabaasaniiru.

Hongee cimaa waggoota sadan darbaniif Godina Booranaatti mudateen qabeenya beeyladaa miliyoona 7.2 keessaa miiliyoona 3.3 kan du’an yoo ta’u, beeyladoota du’an keessaa %85 ammoo loowwan ta’un himameera.

Loowwan hafan keessaa kuma 230 baraaruuf hojjatamaa jira kan jedhan Bulchaan Godina Boranaa Obbo Jaarsoo Boruu, loowwan kanaaf ji’a sadiif qofa margi beelii miiliyoona 4.4 fi nyaanni kuntaalli kuma 135 kan barbaachisu ta’u himuun, hanga ammatti kan dhiyyeessuun danda’ame %1 qofa ta’u himaniiru.

Deeggarsi gahaa jiru hanga yaadameen gadi ta’uu irraa loowwan kana baraaruun ulfaataa akka ta’e kan dubbatan Obbo Jaarsoon, hongee waggoota sadan darban godinichatti mudateen loowwan du’an birri biliyoona 33 olitti kan tilmaamaman ta’u addeessaniiru.

Oduu biraatiin Bulchiinsi Naannoon Hararii Godina Booranaatti lammiilee hongeen miidhamaniif deeggarsa Miliyoona 10 gochuuf murteesse jechuun maddi oduu Addis Standard gabaaseera.

Manni Maree Bulchiinsa Naannoo Hararii lammiilee Godina Booranaatti hongeen miidhamaniif deeggarsa Birrii Miiliyoona 10 taasisuuf murteessuu isaa beeksiseera. Mootummaan Naannichaa deeggarsa lammiileef taasisu cimsee kan itti fufu ta’uu ibseera.

Sababa hongeetiin godinichatti lammiilee hedduun miidhamaa jiraachuu fi miidhaa qaqqabaa jiru hir’isuufis hunduu gahee isaa bahachuu akka qabu dhaamuu isaa ragaan Kominikeeshinii Naannoo Hararii irraa argame ni mul’isa jechuun Addis Standard gabaaseera.