𝐘𝐞𝐫𝐨𝐨 𝐦𝐚𝐥𝐞𝐞 𝐀𝐣𝐚𝐧𝐝𝐚𝐚 𝐡𝐢𝐧 𝐦𝐚𝐥𝐥𝐞 𝐚𝐬 𝐛𝐚𝐚𝐬𝐚𝐧𝐢.

Yeroo malee Ajandaa hin taane fiduun kun akkanumaan waan dhufe miti; itti yaadamee herregaan waan godhame.

Silaa amma kan ta’uu male, ummata keenya Booranaa haala hamtuu keessa jiru dandamachiisuu fi dhaqqabuuf duula Oromoon akka sabaatti jiru daran jabeessanii itti fufsiisuu dha.

Akkamitti haala ummatni kun bifa gaddisiisaa kanaan waan of harkaa qabu cufaan harca’aa jiruu ajandaan ummata gara biraatti harkisu bocama? Kun itti yaadamee kan godhame; galii mataa isaa qaba.

Oromoon garuu kana beekuu danda’uu dha qaba. Osoo ta’ees kan falmannu ganda, ona ykn godinaa osoo hin taane akka biyyaatti Oromiyaa falmanna. Akka sabaatti mirga mulqame falmanna.

Warri aangoo biyya bulchuu of harkaa qabna jedhanis marii fi fedha ummataan alatti caasaa qubsumaa ummatni barootaaf ittiin jiraate waljala dhahuun diigumsa uumuu irraa of qusatuu qaban.

Fedhiin ummataa keessa hin jiru taanaan, yaadni ummata harkaa hin fuudhamne taanaan deemsi abbaa irrummaa akkanaa dhaabbachuu fi ajandaan ummata gidduutti goolii uumu kun ka’uu dha qaba.

Ajandaa waldura nama dhaabu amma akka haaraatti bocamee gadi ba’e kanaan ummatni keenya tokkummaan isaa akka hin sharafamneef ciminaan eeggachuu qaba jechaa, ammas xiyyeeffannaan keenya ummata keenya baraaruutti haa deebi’uun dhaamsa keenya.