𝐇𝐚𝐥𝐞𝐞𝐥𝐥𝐚𝐚 𝐗𝐚𝐲𝐲𝐚𝐚𝐫𝐚𝐚 𝐠𝐚𝐧𝐚𝐦𝐚 𝐤𝐚𝐧𝐚 𝐃𝐚𝐚𝐧𝐧𝐨𝐨𝐭𝐭𝐢 𝐫𝐚𝐚𝐰𝐰𝐚𝐭𝐚𝐦𝐞𝐞𝐧 𝐧𝐚𝐦𝐨𝐨𝐭𝐧𝐢 𝟕 𝐋𝐮𝐛𝐛𝐮𝐮 𝐝𝐡𝐚𝐛𝐮𝐮𝐧 𝐛𝐚𝐫𝐚𝐦𝐞.

Bitootessa 09,2023 ganama har’aa Godina Lixa Shaggar Ona Daannoo bakka Qaallee jedhamutti haleellaa xayyaaraa ganda ummataa irratti mootummaan raawwateen yo xiqqaate namootni 7 ajjeesamuu jiraattotni naannoo gabaasaa jiru. Maanguddoo ganna 68 Obbo Abdiisaa Bakaree jedhaman kanneen ajjeesaman keessatti akka argamanis odeessi ummataa kun dabaluun addeessa.

Miidhaan kun kan dhaqqabeef sababa Waraana Bilisummaa Oromoo (WBO) rukutuu jedhuun akka ta’e oduun ummata keessaa argame kun ifa godha.

Nyamar, Gindabaratii fi naannoo san irra xayyaarri waraanaa MIIGII jedhamu marsaa jiraachuullee oduun kun dabalee hubachiisa.

Mootummaan Bilxiginnaa amma duras eeggannoo tokko malee irra deddeebiidhaan maqaa Waraana Bilisummaa Oromoo (WBO) rukutuu jedhuun gandeen ummataa keessatti tarkaanfii qilleensa irraa fudhataa tureen ummata nagaa meesha-maleeyyii dhibboota hedduun ajjeesuu, qaamaa hir’isuu, manneenii fi qabeenya ummataa barbadeessaa turuun kan yaadatamuu dha.