Wallisaa Sa’aad Awwal Murtii Malee Waggoota Lamaaf Mana Hidhaa Keessatti Hiraarsamaa Akka Jiru Ibsame

Weelluwwan warraaqsaa fi aadaa, addatti sirboota aadaa Oromoota Walloo fi Raayyaa wallisuudhaan kan beekamu Art.Sa’aad Awwal waggaa lamaan dura qabamee erga hidhamee hanga har’aatti murtii haqaa dhabee hidhaa keessatti gidirsamaa jiraachuu BBCn maatii isaa waabeffachuun gabaase.

Haati warraa Art.Sa’aad Awwal Aadde Zaakiraam bakka abbaan manaa ishee Art.Sa’aad Awwal itti hidhamee jiru seentee daawwachuu akka dhorkamte himteetti.

Erga Art.Sa’aad Awwal hidhamee jireenya tasgabbii hin qabne keessatti kufanii jiraachuu Aadde Zaakiraam dubbatteetti.

Wayta inni hidhamu garaattan baadha kan jedhan Aadde Zaakiraam, osoo inni mana hidhaa jiruu da’uu ibsuun, amma ijoollee lama akka qabanii fi inni ijoollee isaa irraa fagaachuutti rakkoo hamtuun akka isaan mudate ifoomsan.

Art.Sa’aad Awwal sirboota isaan hawaasaaf sagalee ta’uu qofa osoo hin taane, madda galii jireenya isaatis ta’uu hubachiisuudhaan, erga inni hidhamee garuu daa’ima lama baatanii hojii hojjechuun akka isaanitti ulfaate; gargaarsa namni hanga tokko isaanii godhaa jiraniin jiraachaa akka jiran himaniiru.

Abbaan warraa isaanii Art.Sa’aad Awwal waggaa lama dura magaalaa Baatee irraa humnoota mootummaa naannichaan qabamee hidhamuu kan dubbatan Aadde Zaakiraam, qawwee fudhatte ittiin jechuun ala himannaan irratti dhiheessan tokko illee akka hin jirre BBCf ibsaniiru.

Art.Sa’aad Awwal jalqaba iddoo jireenya isaa magaalaa Baateetti hidhamuu fi isa booda gara Waajjira Poolisii Magaalaa Kamiseetti dabarsamee ji’oota torbaaf osoo himatni irratti hin banamee mana murtiitti hin dhihaatin turee, ji’a torba booda mana murtiitti dhiheessan kan jedhan Aadde Zaakiraam, akkanumaan dhiheessanii beellama irratti qabatu malee himata irratti akka hin dhiheessine addeessan.

Haati warraa Art.Sa’aad Awwal Aadde Zaakiraam, yeroo inni dhaddachatti dhihaatu hunda konkolaataadhaan mana isaanii irraa fageenya sa’aa shanii olii imaluun Kamisee dhaqanii kan ilaalan ta’uu himuun, waan argatan baasii geejjibaatti akka fixan, karaa dheeraa kana ijoollee qabatanii deddeebi’uun mataan isaa qormaata guddaa itti ta’uu fi sababa kanaanis dararamaa jiraachuu addeessaniiru.

“Amma abdiin nutti dukkanaa’eera. Nama nu gargaarus hin qabnu. Gaaddisa keenya kan turan abbaan isaa erga du’anii nama harka nu qabu hin qabnu.” jechuun Aadde Zaakiraam gaddaan yaada isaanii BBCf kunnuu dhaabbatni kun ifoomseera.

Aadde Zaakiraam Caamsaa 30, 2023 Kibxata kaleessaa daa’ima harma hoosisan qabatanii abbaa warraa isaanii Sa’aad Awwaliin dubbisuuf gara Kamisee imalanis akka fedha isaaniitti arganii dubbisuu akka hin danda’in dubbatan.

Kaleessa beellama mana murtii kan qabu yoo ta’u, Aadde Zaakiraam ganamaan itti dhaqnaan beellama mana murtii booda kottu ittiin jechuun kan deebisan yoo ta’u, waaree booda itti deebi’anis seenuu akka dhorkan addeessaniiru.

Art.Sa’aad Awwal dhibee dhiigaan walqabatuun qabamee mana hidhaa kana keessatti akkaan dhukkubsataa fi rakkachaa akka jiru kan himan Aadde Zaakiraam, mana waldhaansaatti akka hin geessaminii fi dhibee isaas osoo adda hin baasin manuma hidhaa keessatti qoricha bitanii itti kennu jechuun haala ulfaataa inni keessa jiru BBCf addeessaniiru. 

Sirboota warraaqsaan kabajamuu mirga Oromoof kan falmuu fi weelluwwan aadaa Oromoo Walloo fi Raayyaan kan beekamu Art.Sa’aad Awwal, dabaa fi cubbuun hidhamee waggoota lamaa oliif haqa dhabee hanga yoonaa hidhaa keessatti hiraarsamaa jira. Ilmaan Oromoo iddoo jiran cufaa Art.Sa’aad Awwaliif sagalee ta’uudhaan hidhaa dabaa kana keessaa akka ba’uuf dirmadhaafiin dhaamsa keenya.