Dureewwan Orthodoksii Naannoo Tigraayi murtii Qulqulluun Sinodoosii Mana Kiristaanaa Orthodoksii Tawahidoo Itophiyaa dabarse akka hin fudhanne beeksisan.

Dureewwan kunniin ibsa Hagayya 03, 2023 Kamisa kaleessaa baasaniin, Manni Kiristaanichaa murtoo dabarse keessa deebi’ee akka ilaalu gaafatan.

Tibbana qaamni olaanaa Mana Kiristaanichaa walgahii hatattamaa taa’een abbootii amantaa Naannoo Tigraayitti muudama kennanii fi fudhatan jedhaman aangoo lubummaa irraa mulqaniiru.

Murteen kun dureewwan Naannoo Tigraayitti argaman ittiin bulmaataa fi beekamtii mana kiristaanichaa malee muudama raawwachuu isaanii ibsu hordofee akka ta’etu ibsame.

Murtee kana hordofee abbootiin amantaa Orthodoksii Naannoo Tigraayi ibsa Kamisa kaleessaa baasan kanaan murteen Qulqulluu Sinodoosii Orthodoksii Itoophiyaa dabarse balaaleffannaa homaa gatii hin qabnee waan ta’eef, fudhatama akka hin qabne hubachiisan. Murtichis deemsa isaanii irratti homaa dhiibbaa kan hin fidne ta’uus hubachiisan. Murteen darbe deebi’ee akka ilaalamu gaafatuun, ta’uu baannaan garuu murtoo ulfaataa akka fudhatan akeekkachiisan.

Dureewwan Tigraay dhimma waraanaan walqabateen Mana Kiristaanaa Orthodoksii Itoophiyaa waliin dhibdee seenan, mana kiristaanichaa irraa adda bahuun caasaa bulchiinsaa haaraa hundeessatuun isaanii ni yaadatama.