Rakkoo nageenyaa naannoo Amaaraatti babal’achaa dhufe hordofuun manni maree ministeerotaa mootummaa PP labsii yeroo hatattamaa dabarse.

Naannoo Amaaraatti rakkoo nageenyaa babala’achaa dhufeen walqabatee manni maree ministeerotaa sirna mootummaa paartii Biltsiginnaa walga’ii idilee Hagayya 04, 2023 har’a gageesse irratti labsiin yeroo hatattamaa akka labasamu sagalee guutuun murteesseera.

Labsiin yeroo hatattamaa kun akka dabarfamu kan murteeffame aanga’oonni feederaalaa fi naannoo Amaaraa nageenyi naannichaa hidhattoota Faannoon boora’aa jiraachuu ibsuu hordofee akka ta’e maddeen gabaasaniiru.

Jiraattonni naannoo Amaaraa keessatti nageenyi boora’uu ibsuun rakkoon tasgabbii mul’achaa jiru yaaddeessaa ta’uu himaa jiran.

Haalli impaayerri Itophiyaa keessatti kuftee jirtu kan yeroo kamiiyyuu caalaatti ulfaataa, sadarkaa suphaa fi humnaan rakkoo jiru furuuf yaaluu irra darbee akka jiru bal’inaan ibsamaa jira.

Waraanni/lolli guutuu biyyattii keessatti babal’ateera; dhumaatiin ummataa, barbadaawuun qabeenyaa, buqqaatiin ummataa, kana irra darbee dinagdeen biyyaa kufuu, jireenyi qaala’uu fi beelli hammaatuun ummatoota akkaan hudhee qabee jira.

Mootummaan PP rakkinoota jiraniif fala siyaasaa soquu osoo hin taane, akkuma bittoota darbanii waraana babal’isuu, waliin dhahiinsaan jiraachuu fi tooftaa fi shiroota garagaraan bara bittaa dheereffachuuf wixxifachaa jira. Kun garuu yeroon isaa fiigicha baay’ee olaanaadhaan dhumataa akka jiru; biyyattiinis bifa ammaan itti fufuu akka hin dandeenye mul’ataa jira.

Addi Bilisummaa Oromoo ABOn irra deddeebiin rakkoo impaayera Itophiyaaf furmaata kan jedhe akka imaammataatti kan qabatee ittiin socho’u yaada furmaataa irra deddeebiidhaan mootummaa PPfis, hawaasa addunyaafis dhiheessaa kan turee fi ammas dhiheessaa kan jiruu dha.

Yaadni Furmaataa ABOn dhiheessu dhibdee biyyattii kanaaf furmaata waaraa akka argamsiisu shakkiin hin jiru. Kanaa ala deemsi deemamu akkuma amma argamaa jiru biyyattii gara dhidhimaatti, ummatoota rakkoo hamaa keessaa ba’uun hin salphannetti kennuu dha.