𝐂𝐚𝐫𝐫𝐚𝐚 𝐎𝐫𝐨𝐦𝐨𝐨 𝐒𝐢𝐫𝐧𝐚 𝐈𝐦𝐩𝐚𝐚𝐲𝐞𝐫𝐚 𝐈𝐭𝐨𝐩𝐡𝐢𝐲𝐚𝐚 𝐣𝐚𝐥𝐚𝐭𝐭𝐢!

Godina Lixa Shaggar Ona Gindabarat – Jimlaan ajjeefamu hanga qe’ee ofii gadhiisanii baqatuutti…

Kaleessas har’as hireen Oromoo bittoota impaayera Itophiyaa jalatti ajjeefamuu, hidhamuu, qe’ee fi qabeenya ofii irraa buqqifamuu dha. Sababa kanaan miliyoonaan harca’eera.

Bara bittaa abbaa irree sirna Biltsiginnaa waggoota shanii keessatti ammoo kan Oromoo mudatee fi mudataa jiru kan daranii ti. Ajjechaan nam-tokkee irraa hanga jimlaatti raawwatamu himuufuu suukanneessaa ta’eera. Hidhaan mana Oromoo hunda galeera sadarkaa jechuun danda’amu irra jira. Buqqaatiin ummataa kumootaan osoo hin taane miliyoonotaan lakka’aama. Kanaan Oromoon akka baalaa harca’aa jira.

Kan argaa jirtan Oromoota Godina Lixa Shaggar Ona Gindabarat irraa maqaa WBOn mootummaan Biltsiginnaa waraana irratti banee hanga danda’u ajjeesee fi hidhe irraa kan hafan qe’ee fi qabeenya isaanii dirree irratti gatanii baqachuuf dirqamanii dha. Ummatni kun irra jireessi isaa mannii fi qabeenyi duraa manca’eera. Ummatni 10,000 olta’u gandoota 22 Ona Gindabarat keessaa buqqa’an kun waan nyaatanii fi dhugan dhabanii dirree irratti faca’anii haala ulfaataa keessatti kufanii argamu. Maanguddootni, dubartootnii fi daa’imman lakkoobsaan guddatu. Isaan kun qaama isaaniif dirmatuu fi gargaaru dhabanii jiruu hamtuu sirni impaayeraa itti fideen waldhaansoo qabaa jiran.

Har’a hireen Oromoo Bahaa-dhihatti, Kaabaa-kibbatti giddu-galeessaanis ta’u walfakkaataa ykn tokkichuma. Ajjeefamuu, hidhamuu, buqqaafamuu, manaa fi qabeenyaan mancaafamuu (ibiddaan barbadeeffamuu) ta’ee jira.

Bu’aan jijjiiramaa fi ida’amuu sirna PP kan Dr.Abiy Ahmed mataa itti ta’ee jiru Oromoof argamsiise isa kana dha.

Haalli kun akkanatti itti fufnaan, dhumaatiin ykn gaaga’amni Oromoo mudatuuf jiru kan daranii fi suukanneessaa ta’a. Miidhaa akka sabaatti dhufe kana akka sabaatti dhaabbii itti tolchuun dirqama sabummaa Oromoo irra jiruu dha.