Mootummaan Ertiraa Daandiin Qilleensaa Itoophiyaa Fulbaana booda gara Asmaraa akka hin imalle dhorkuun dhaga’ame

Mootummaan Ertiraa dhuma baatii Fulbaanaa booda balalii Daandiin Qilleensaa Itoophiyaa gara magaalaa guddoo biyyattii Asmaraatti godhu akka addaan citu murteessuu maddeen oduu gabaasan.

Ministeera Geejjibaa fi Kominikeeshinii Ertiraatti Abbaan Taayitaa Siviil Aviyeeshinii ibsa har’a Adoolessa 24, 2024 baaseen, Daandiin Qilleensaa Itoophiyaa gara Ertiraa balalii akka hin taasifne dhorkamuu ibseera. 

Abbaan Taayitichaa kun akka beeksisetti, Fulbaana 30, 2024 irraa eegalee Daandiin Qilleensaa Itoophiyaa balalii gara Ertiraa taasisu hunda akka addaan citu murteessuu ifa taasise.

Daandiin Qilleensaa Itoophiyaa akka dhorkamu kan murteeffame imaltoota irratti dararaa “qindaawaa fi itti yaadame” geessisuu isaatini tahuu hubachiise. 

“Boorsaa imaltootaa hatamuu”, akkasumas irra deddeebiin harkifannaan balalii fi meeshaalee imaltootaa irratti gahaa turuu eeruun, daandiin qilleensichaa imaltootaaf “beenyaa osoo hin kaffalin tureera” jedhe. 

Kana malees, daballii gatii tikeetii bu’uura irratti hin hundoofne mul’atu murtoo kanaaf sababa ta’uu eereera. 

“Rakkoolee armaan olitti ibsaman hiikuuf Daandii Qilleensaa Itoophiyaaf irra deddeebiin hubachiisni laatamuufis bu’aa waan hin argamsiisneef, Fulbaana 30, 2024 irraa eegalee balaliin Daandii Qilleensaa Itoophiyaa gara Ertiraa taasifaman akka addaan citu murtaa’eera.” jedha ibsichi.

Mootummaan Ertiraas ergaa imaltoota Daandii Qilleensaa Itoophiyaaf dabarseen, imaltoonni Fulbaana 30 booda daandiin qilleensichaan balali’uuf karoorfatan filannoo biraa akka barbaaddatan hubachiisuu ibsu maddeen. 

Dhimma kana ilaalchisee Daandiin Qilleensaa Itoophiyaa ammatti waan jedhe akka hin qabnes ibsameera.

Daandiin Qilleensaa Itoophiyaa balalii gara Asmaraatti godhu bara 2018 erga Abiy Ahmed aangoo Impaayera Itoophiyaa bulchuu dhuunfateen booda deebi’ee jalqabuu kan yaadachiisan maddeen, torbanitti marroo 5 gara Asmaraatti balali’aa kan jiru daandichi, turtii waggoota 6 booda deebi’ee addaan kan citu tahuu ifa godhu.

Walitti dhufeenyi mootummaa Dr.Abiy Ahmedii fi Erteraa bara 2018 TPLF aangoo irraa kaafamuun booda akkaan kan jabaatee fi keessoon mootummaa Dr.Abiy Ahmed Eteraaf haalaan banaa kan ture yoo ta’u, bu’uuruma kanaanis humni waraana Erteraa lola Tigraayi irratti waggoota lamaaf deeme keessatti afeerraa mootummaa PPn akka hirmaatu taasisamuun Tigraayi keessatti duguuggaa sanyii raawwataniin kan himatamaa jiran yoo tahu, Oromiyaattis WBOtti akka duulchifamaniif afeerraa mootummaa PP Dr.Abiy mataa itti ta’aniin humni waraana Erteraa Oromiyaa seenuun kan yaadatamuu dha.