𝐒𝐢𝐫𝐧𝐢 𝐆𝐞𝐠𝐠𝐞𝐞𝐬𝐬𝐚𝐚 𝐉𝐚𝐚𝐥 𝐌𝐨’𝐢𝐛𝐨𝐨𝐧 𝐁𝐚𝐪𝐪𝐚𝐥𝐚𝐚 𝐡𝐚𝐫’𝐚 𝐎𝐧𝐤𝐨𝐥𝐨𝐨𝐥𝐞𝐬𝐬𝐚 𝟏𝟒,𝟐𝟎𝟐𝟐 𝐦𝐚𝐠𝐚𝐚𝐥𝐚𝐚 𝐍𝐚𝐪𝐚𝐦𝐭𝐞𝐞𝐭𝐭𝐢 𝐫𝐚𝐚𝐰𝐰𝐚𝐭𝐚𝐦𝐞𝐞𝐫𝐚

Bakka Oromootni hedduun qaamota hawaasa garagaraa irraa ta’an argamanitti sirni awwaalchaa miseensa GS-ABO Jaal Mo’iboon Baqqalaa guyyaa har’aa kana Onkoloolessa 14,2022 magaalaa Naqamteetti geggeessameera.

Jaal Mo’iboon Baqqalaa Onkoloolessa 12,2022 galgala qarqara magaalaa Finfinnee fi Buraayyuu gidduu naannoo mana isaa iddoo Saansuusii jedhamutti qaamota hidhataniin rasaasaan dhawamee yerooma sana hospitaala geessamus irraa hafuu dadhabee, yeroo gabaabduun booda lubbuun isaa dabarte.

Addi Bilisummaa Oromoo (ABO)n ibsa gaddaa Onkoloolessa 13,2022 baaseen, Mo’iboon Baqqalaa dargaggeessa qaroo fi miseensa GS-ABO, jireenya isaa guutuu qabsoo Oromootiif kenne ta’uu addeesse.

Sirna ADWUI/EPRDF keessa mana hidhaa Ma’aakalawiitti waggoota hedduuf hidhamee dararamaa turuu yaadachiisuun, sirna ammaa jalattis baatileef hidhamee dararaa cimaan irra gahuu erga hubachiiseen booda, matiin isaas humnoota nageenyaa mootummaatiin gidirfamaa fi sodaachifamaa takka turan hubachiiseera.

Wareegamuu dargaggoo qaroo fi qaama hoggana isaa kanaan ABOtti gadda cimaatu itti dhagahama kan jedhe ibsi ABO kun, Maatii isaa, jaallan isaa fi ummata Oromoo bal’aaf jajjabina hawweera.

Bifuma walfakkaatuun paartiin Kongiresii Federaalawaa Oromoo (KFO)n ibsa gaddaa Onkoloolessa 13,2022 baaseen, ajeechaa hoogganaa ol’aanaa ABO, Mo’iboon Baqqalaa irra gahetti gadda cimaa itti dhaga’ame ibsee, maatii, firootaa fi jaallewwan qabsoo isaatiif jajjabina hawwee jira.

Hooggansa dhaaba siyaasaa dabalatee ajjeechaan namoota nagaa irratti gaggeeffamu yaaddoo cimaa kan uume ta’uu kan ibse KFOn ibsa isaa kanaan, qaamni seeraa dhimma kana saffisaan akaa qoratee ummataaf ifa godhus gaafateera.

Hawaasni Oromoo biyya keessaa fi biyya alaa karaa miidiyaalee hawaasaa fi kkfn ajjeefamuu miseensa GS-ABO Jaal Mo’iboon Baqqalaatti gadda itti dhaga’ame ibsataa, seenaa fi hojii qabsoo inni haga gaafa wareegamuutti keessatti dabarse himaa fi mul’isuu irratti argaman.

Qabsa’aan Ni Kufa, Qabsoon Itti Fufa!