Waraana Isa Tokko Karaa Nagaa, Isa Biraa Ammoo Humnaanan Fixa Jechuun Kan Hin Baasne Ta’uun Ibsame

Ogeessa Seeraa Idil-Addunyaa kan ta’an Obbo Baay’isaa Waaqwayyaa Aaf-Gaaffii tibbana BBC waliin godhaniin, waraana isa tokko karaa nagaan furmaata itti soqaa, isa biraa ammoo humnaanan bal’eessa jechuun kan hin deemsisnee fi hin danda’amne ta’uu akeekan.

Obbo Baay’isaan Itophiyaaf nagaa buusuun kan danda’amu akkuma humnoota Tigraayi waliin nagaan bu’e, Oromiyaa keessattis yoo waliigalteen nagaa raawwatee dha jedhan.

Waraana waliinii biyyoota Baha Awurooppaa qaamaan kan hordofaa turanii fi dippiloomatiin UN duraanii Obbo Baay’isaa Waaqwayyaa, humnoota Tigraayii fi mootummaa Itoophiyaa gidduutti waraanni waggaa lamaaf gaggeeffame marii torbanootaan waliigalteetti dhufamuun akka isaan raaje BBC’tti himuun,  Itoophiyaan guutummaatti kan nagaa argattu garuu Oromiyaa keessattis warra hidhannoon lolu wajjin araarri yoo bu’ee dha jechuun ifa godhaniiru.

Rakkoon Oromiyaa keessa jiruu fi gaaffiin ka’u waraana Tigraay dura akka turee fi xiyyeeffannoo maluuf akka hin arganne kan dubbatan Obbo Baay’isaan, wayta Itophiyaa turanitti namoota alaa dhimma nagaa irratti hojjetan waliin dubbachaa akka turanii fi nama tokkoon alatti gaaffiin saba Oromoo barbaachisaa dha; furmaata argachuu qaba kan jedhu hin turre jedhaniiru.

Oromiyaa keessa nagaa fi tasgabbiin hin jiru taanaan, Itophiyaan nagaa fi tasgabbii hin qabaattu; sababni salphaan ammoo waayee ummata biyyattii keessaa dhibbentaa’’40 (40%) ti jedhan.

Isa tokko karaa nagaa, isa tokko ammoo humnaanan fixa jechuun hin ta’u kan jedhan Obbo Baay’isaan, gaaffiin Oromiyaa keessa jiru hanga isa Kaabaa walxaxaa akka hin taane erga ibsanii booda, barnootni araara Piritooriyaa irraa argame mariidhaan waraana hiikuun ni danda’ama kan jedhuu dha jedhaniiru.

Qaamni Oromiyaa keessatti hidhannoon lolaa jiru kaayyoo dhaabbateef hin qabu jechuun sirrii miti kan jedhan diplomaatiin UN duraanii Obbo Baay’isaa Waaqwayyaa, kaayyoo malee namni mana isaa dhiisee bosonatti galee lolu hin jiru jechuun addeessan.

Kaayyoon lolamuuf heera biyyaan deebii argachuu akka danda’u kan ibsan Obbo Baay’isaan, kanaaf ammoo gadi taa’anii dubbachuutu sirrii dha erga jedhanii booda, Taankii fi Marfiin nagaa fiduu akka hin dandeenye hubachiisan.

Haalli amma jiru ummata nagaa gaaga’aa jiraachuu Obbo Baay’isaa Waaqwayyaa addeessuun, mariidhumatu furmaata fida jechuun Aaf-Gaaffii BBC waliin godhan irratti yaada isaanii mul’isaniiru.