Diraamaa Gamaa fi Gamanaa

Hiriirri gamaa fi gamanaa kun Oromoo waan fayyadu hin qabu. Paartiin PP waggoota shanan darban kana jijjiirama ajaa’ibaa waan argamsiiseef ba’aa na deggeraa jedhee deggertoota isaa hiriira baasuuf yoo yaalu mul’ataa jira.

Nafxanyootni, finxaaleyyiinii fi deggertootni isaanii ammoo Itophiyaa dullattii isaanii durii fi sirna fokkisaa kaleessaa san Oromootti deebisuuf bulchiinsa waggoota shanan darbanii bara bittaa PP balaaleffatu. Diraamaan agarsiisamaa jiru ajaa’ibuma!

Dhugaa yo dubbanne Oromoof jijjiiramni sirna PP jalatti dhufe hin jiru. Mee maaltu Oromoof argame.

Waggaan shan barri bittaa PP Oromoof dhuguma bara jijjiiramaa fi Oromoon waan irra wayya’aa argatee dha moo bara itti akka baalaa harca’ee dha? Qe’een Oromoo hundi qe’ee boo’ichaa fi gaddaa ta’ee hin jiruu? Duuti, buqqaatiin, hidhaan, baqi, diigumsi akka hawaasaatti baroota shanan darban kana Oromoo mudate galmee seenaa keessaa ifee mul’ata. Siyaasaan, dinagdeen, hawaasummaan baroota kana Oromoon akka hin jirre ta’e.

Bilxiginnaan har’ayyuu Oromoo dhiigsaa jira; qe’ee Oromoo gaddaan uwwisee jira; Oromoo saamee hiyyoomsaa jira; Oromoo jumlaan hidhaatti guuraa jira. Sab-boontota ilaalcha siyaasaa isaanii qofaan hidhaan gidirsaa jira. Miseensota, qondaalotaa fi hoggantoota ABO hidhaa keessatti itti taphataa jira.

Sochii dhaabota Oromoo warra ummata biratti dhageettii fi fudhatama qaban ugguree gadi qabaa siyaasaa guddaa irraan ga’aa ture; har’as itti caale malee irraa hin wayyoofne.

Rakkoo siyaasaa jiru dhaabota Oromoo haqaan ummata isaaniif falman akka ABO faa waliin gadi taa’ee furuuf fedha hin qabu. Dhugaatti araara buusee mooraa Oromoo keessatti tasgabbiin akka bu’uuf murannoo fi hamilee isaa itti hin qabu. Tooftaa yeroo fi kan yeroo rakkinaa ittiin darban godhatee afaaniin waa’ee Oromiyaa fi ummata keessatti nagaa buusuu dubbata. Isa kana aka tooftaa yerootti itti dhimma ba’aa jira malee dhuguma Oromoo fi dhaabota Oromoo waliin nagaa buusuuf barbaadee akka hin taane deemsi shiraa itti jiru ni mul’isa.