Lolli biyya Sudaan keessaa baqattoota Oromoo gara itti deebi’an dhabanii rakkataa jiran haalaan hubaa jira.

Lolli biyya Sudaan keessaa baqattoota Oromoo gara itti deebi’an dhabanii rakkataa jiran haalaan hubaa jira.

Jiruu fi jireenyi dhalli namaa Khartoum keessa ittiin jiraatu sababa lola magaalattii keessatti deemaa jiruu irraa kan ka’e guutuutti dhaabbatee jira. Lammiileen biyya alaa hireen ba’uu isaaniif aanjawee fi dinagdee ittiin sossohan qaban kumaantamaan biyyattii gadhiisanii ba’aniiru. Ummatni biyyattii lakkoobsa guddaa ta’es biyyoota adda addaatti baqatuu itti fufeera.

Baqattootni Oromoo biyyattii keessa jiran, addatti magaalaa Khaartum keessa jiran haalli hundi itti cufamee, gargaarsa tokko malee, lola kana gidduutti qabamanii jiran. Kanneen gara biyyaa deebi’uuf yaalanis karaatti hubaatiin garagaraa irra gahuun himamaa jira. Akkasuu ta’ee baay’een gara biyyaa kan deebi’anis jiraachuun dhaga’ameera.

Amma warri dahannaa siyaasaa jala jiran, gara biyyaa deebi’uuf sirna impaayerattii bitaa jiru irraa yaaddoo qaban, kanneen maatii qaban waggoota 25f waraqaa UN baatanii jiran, haala lolaa biyyattiin keessa seentee jirtu irraa akkaan rakkoo hamaaf saaxilamaniiru. Amma dhaabbattootni idil addunyaa sadarkaa cufti ba’aniiru jedhamuttu guurratanii waan ba’aniif qaamni itti iyyatan hin jiru; haalli isaas hin hayyamu. Kanaaf ilmaan Oromoo kunniin furmaata tokko illee dhabanii yaaddoo hamaa keessatti kufanii argamu.

Ilmaan Oromoo biyya Sudaan, addatti Khartumitti argaman kunniin hawaasni Oromoo biyyoota ambaatti argaman sagalee nuuf ta’aa; malaa fi fala dhawaa nu dhaqqabaa jechuun sagalee iyyannaa kan nutti birmadhaa dabarsatanii jiran.

Lolli Sudaan keessaa ammaaf guyyoota torbaaf dhaabbate haa jedhamu malee, walwaraanuun amma illee itti fufeera kan jedhan maddeen, lola irra jabaaf gareen lamaanuu meeshaalee waraanaa gugurdaa walitti qopheeffataa jiru jedhaniiru. Lolichi eessattii fi yoom akka dhaabbatu beekuun rakkisaa ta’uus maddeen hubachiisaa jiru.