𝐋𝐢𝐱𝐚 𝐒𝐡𝐚𝐠𝐠𝐚𝐫 𝐎𝐧𝐚 𝐉𝐚𝐥𝐝𝐮𝐮, 𝐂𝐨𝐛𝐢𝐢𝐭𝐭𝐢 𝐋𝐚𝐦𝐦𝐢𝐢𝐥𝐞𝐞𝐧 𝐎𝐫𝐨𝐦𝐨𝐨 𝐀𝐣𝐣𝐞𝐞𝐬𝐚𝐦𝐚𝐧 𝟕𝟎 𝐝𝐡𝐚𝐪𝐪𝐚𝐛𝐮𝐮𝐧 𝐢𝐛𝐬𝐚𝐦𝐞

Haleellaa xayyaara nam-maleeyyii (Drone) mootummaan Bilxiginnaa Onkolooleessa 23,2022 guyyaa kaleessaa Lixa Shaggar Ona Jalduu, Cobiitti geggeesseen ummatni siviiliin lubbuu dhaban 70 dhaqqabuun bal’inaan gabaasamaa jira.

Lakkoobsi namoota du’anii kana caaluu akka danda’u kan hubachiisan maddeen, sababni quunnamtiin rakkisaa ta’ee jiruuf haalli jiru yaaddessaa ta’uu eeru.

Namoota tarkaanfii bineensummaa sirna Bilxiginnaan madaa’an adda baasachuun ammatti rakkisaa ta’uu fi manneenii fi qabeenya manca’anis himuun akka rakkoo ta’ee jiru illee ifoomsaniiru.

Mootummaan Bilxiginnaa sochii WBO daangessuu ykn if booda deebisuu akeeka jedhuun, tarkaanfii diroonii godinaalee Oromiyaa adda addaa keessatti hammeessaa kan jiru yoo ta’u, gocha kanaanis, ummata nagaa homaatuu quba hin qabne, bakka baay’atanii jiraatan, gandeenii fi magaalota keessatti, bakka gabaatti haleeluudhaan dhibbootaan ajjeesuun gocha faashistummaa fi yakka waraanaa raawwatuu irratti argama.

Guutuu Oromiyaa keessatti dhiigni lammiilee Oromoo akka bishaanii lola’aa kan jiru yoo ta’u, ajjechaan jumlaa Mettaa Walqixxee fi Jalduu, Cobiitti raawwatame kanaaf ragaa guddaa dha.

Mootummaan Bilxiginnaa diinummaa ummata Oromoof qabu daran hammeessaa, faashistummaa isaas addunyaatti mul’isaa jira.

Kan nama dhibu garuu Oromootni garii oggaa qaamni isaa gar-tokkeen dhiigaa fi akka baalaa harcaafamaa jiru kanatti taa’ee ilaaluu fi keessummeessuu isaa ti. Gocha abaaramaa fi diinummaa ija baase ummata qulqulluu irratti sirna mootummaa Bilxiginnaan raawwatamaa jiru kana Oromoon sagalee tokkoon dura hin dhaabbatu taanaan, duguuggaan kana caalu dhaqqabuuf akka jiru shakkiin hin jiru.