𝐁𝐨𝐨𝐫𝐚𝐧𝐧𝐢 𝐦𝐚𝐚𝐥 𝐤𝐞𝐞𝐬𝐬𝐚 𝐣𝐢𝐫𝐚?

Torbanoota lamaa fi sadii dura karaa miidiyaalee keenyaan iyyaa turre; hanga har’aattis iyya kana hin dhaabne. Oromoon Booranaa hongee dhalateen walqabatee beela ulfaattuu, yeroo fi beellama namaaf hin laanneen qabamee harca’aa jiraa, Oromoo osooma ajandaalee garagaraa guyyuu bocamanii nuu dhufaniin iyyaa oolluu, cinaadhaan ammoo ummata Oromoo Booranaaf sagalee ta’aa, gurra ergisaaf jennee iyyaa turre; kan nu dhaga’e garuu xiqqaa ture.

Haa ta’uu ammas hin dabarre; guyyoota lamaan kanaa as sochiileen mumul’ataa jiran, duulli miidiyaalee hawaasaa irratti deemaa jiru, ummata kana lubbuu hambisuuf nam-tokkeenis ta’e akka gurmuutti, dhaabbattootni tokko tokkos sochiin godhaa jiran abdachiisaa dha. Ummata kanaaf abdii dha.

Booranni dur Aannaan akka bishaaniitti itti fayyadamu har’a loon harkaa dhumuu irraa Aannan waliin wal argaa hin jiru. Aannaan hafnaan bishaan qoonqoo jiifatee lubbuun akka hin baaneef ittiin tursatu iyyuu dhabaa jira. Nyaatuma hangi taate karaa namoota adda addaan itti dhaqaa jiru sababa bishaan hin jirreef sooratuufuu guddoo rakkataa akka jiru tibbana namootni dubbisne nuu himaniiru. Artist Ummuu Booranaas kanuma jabeessitee dubbatte.

Booranni dagatameera; ammoo angafti Oromoo kun dagatamuu hin malle; bor Oromoo hundatu itti sheenawa; Boorana dhumaatii irraa oolchuun dirqama Oromoo hunda ilaallatu ta’uu himte. Dhugaan jirus kanuma.

Nam-tokkeen, gurmuun, hawaasni, akka waliigalaatti ammoo Oromoon, Oromoo Booranaa beelaan dhumataa jiru lubbuu oolchuuf osoo beellama hin qabanne karaa isaaf mijatee fi waan danda’e hundaan itti haa dirmatu jenna.